PUBG எனப்படும் பிளேயர் அன்நோன்ஸ் பேட்டில்கிரவுண்ட்ஸ் உலக அளவில் மிகவும் புகழ்பெற்ற ஆன்லைன் கேம் ஆகும். இதன் இந்திய வெர்சனான பேட்டில்கிரவுண்ட்ஸ் மொபைல் இந்தியா (Battlegrounds Mobile India) நாளை (ஜூன் 18) இந்தியாவில் வெளியாகவுள்ளது. ஆண்ட்ராய்ட் பயன்பாட்டாளர்களுக்கு இதற்கான முன்பதிவு மே 18ஆம் தேதி தொடங்கியது. பப்ஜி மீது ஆர்வம் கொண்டவர்கள் மத்தியில் இந்த கேம் எதிர்பார்ப்பை ஏற்படுத்தியுள்ளது. அதேசமயம் இதற்கு எதிர்ப்பும் நிலவுகிறது.
சீனா - இந்தியா இடையேயான மோதல் போக்கு காரணமாகவும், தேசிய பாதுகாப்பு, தனிநபர் உரிமை ஆகியவற்றை கணக்கில் கொண்டும் பப்ஜி உள்ளிட்ட சில அப்ளிகேசன்களை கடந்த ஆண்டு இந்திய அரசு தடை செய்தது. அதுமட்டுமல்லாது சிறுவர்கள் முதல் இளைஞர்கள் வரை பலரும் இந்த விளையாட்டுக்கு அடிமையாகி இருப்பதாகவும் கூறப்பட்டது.
சீனாவின் பெஹமோத் டென்செட்டின் கீழ் செயல்படும் கிராப்டான் எனும் தென்கொரிய நிறுவனத்தால் இந்த கேம் தயாரிக்கப்பட்டது. தற்போது அதே நிறுவனம்தான் பேட்டில்கிரவுண்ட்ஸ் மொபைல் இந்தியா எனும் பெயரில் உள்ளே நுழைகிறது. இந்த கேம் நாளை இந்தியாவில் வெளியாகவுள்ள நிலையில், இதற்கு எந்த அனுமதியும் பெறவில்லை என கூறப்படுகிறது.
தேசிய பாதுகாப்பு வல்லுநர் கௌரவ் தியாகி, தகவல் அறியும் உரிமைச் சட்டத்தின் கீழ் இதுகுறித்த தகவலை சேகரித்துள்ளார். அதனடிப்படையில் இந்த கேம் எந்த அனுமதியும் பெறாமல் இந்தியாவுக்குள் நுழைய இருப்பது தெரிய வந்துள்ளது.
இதுகுறித்து கௌரவ் தியாகி, இந்தியாவில் தயாரிக்கப்பட்டது என்ற அடையாளத்தோடு இந்த கேம் அங்கீகரிக்கப்பட்டாலும், தனியுரிமைக் கொள்கை ( privacy policy) அடிப்படையில் இதன் தகவல்கள் பிற நாடுகளுக்கும் பகிரப்படும். இந்தியச் சட்டத்தின் கீழ் இந்த கேம் செயல்படாது. எனவே இந்தியச் சட்டத்துக்குள் அடங்காத கேமை அரசு தடை செய்ய வேண்டும். இதற்கு அனுமதி அளித்தால் WeChat, TikTok போன்றவையும் வேறு வழியில் உள்ளே நுழைய முயற்சிக்கும் என தெரிவித்துள்ளார்.
பேட்டில்கிரவுண்ட்ஸ் மொபைல் இந்தியா விளையாட இதுவரை 2 கோடிக்கும் அதிகமானோர் முன்பதிவு செய்துள்ளனர். அருணாச்சலப் பிரதேச சட்டப்பேரவை உறுப்பினர் நினோங் எரிங், இந்த கேமை இந்தியாவுக்குள் நுழையவிடக் கூடாது என பிரதமர் மோடிக்கு கடிதம் எழுதியிருந்தார். ஆனால், கிராப்டான் நிறுவனமோ தாங்கள் இந்திய சட்ட திட்டங்களை மதித்துதான் இதை உருவாக்கியுள்ளோம் என தெரிவித்துள்ளது. கடந்த ஆண்டு நவம்பர் மாதம் பப்ஜி கார்ப்பரேஷன், 750 கோடி ரூபாயை இந்தியாவில் வீடியோ கேம்கள், ஐடி துறைகளில் முதலீடு செய்யப்போவதாக தெரிவித்திருந்தது கவனிக்கத்தக்கது.
இதன்பின் இப்படி ஒரு அரசியல் ஓடிக்கொண்டிருக்க, சிறுவர்களும் இளைஞர்களும் நாளை இதை விளையாட ஆவலுடன் காத்திருக்கின்றனர்.
இதையும் படிங்க: ‘பப்ஜி மதன் வழக்கில் தமிழ்நாடு காவல் துறை முறையாக விசாரிக்கிறது’ - அமைச்சர் மனோ தங்கராஜ்
