கிருஷ்ணகிரி மாவட்டம் குருபரப்பள்ளி அருகே உள்ள பி.திப்பனப்பள்ளியைச் சேர்ந்தவர் ராஜேஷ் (வயது 31). இவரது மனைவி கவுதமி (29). இவர்களுக்கு கடந்த 2012 ஆம் ஆண்டு திருமணம் நடந்தது. ஒரு மகன், மகள் உள்ளனர். ராஜேஷ் ராஜஸ்தான் மாநிலம் ஜோத்பூரில் ராணுவ வீரராக பணிபுரிந்து வருகிறார். இந்நிலையில் கவுதமி கடந்த 5 ஆம் தேதி காலை வீட்டில் கொலை செய்யப்பட்டு கிடந்தார். அடையாளம் தெரியாத நபர் ஒருவர் தலையணையால் அவரது முகத்தை அழுத்தி கொலை செய்திருப்பதாக கண்டுபிடிக்கப்பட்டது. இது தொடர்பாக குருபரப்பள்ளி காவல் ஆய்வாளர் பிரபாவதி வழக்குப்பதிவு செய்து விசாரணை நடத்தினார்.
அதில், கவுதமியின் கணவர் ராஜேஷிற்கும், கர்நாடக மாநிலம் தும்கூர் சதாசிவம் நகரைச் சேர்ந்த கலைவாணி(30) என்ற பெண்ணுக்கும் தகாத உறவு இருந்தது தெரியவந்தது. இதுகுறித்து அறிந்ததும் கவுதமி அவரது கணவரை கண்டித்து வந்ததும் விசாரணையில் தெரியவந்தது. இதனால் இந்த கொலையில் ராஜேஷிற்கு தொடர்பு இருக்கலாம் என்ற கோணத்தில் காவல்துறையினர் விசாரணை நடத்தினர். அதில், ராஜேஷ் ராணுவத்திலிருந்து சொந்த ஊருக்கு செல்வதாகக் கூறி விடுமுறையில் வந்தது தெரியவந்தது. இதையடுத்து அவரை காவல்துறையினர் தேடி வந்தனர்.
இந்நிலையில் கிருஷ்ணகிரியில் பதுங்கியிருந்த ராஜேஷை நேற்று முன்தினம் காவல்துறையினர் கைது செய்தனர். அப்போது அவர் தனது காதலியின் தூண்டுதலின் பேரில்தான் தனது மனைவி கவுதமியை கொலை செய்ததை ஒப்புக்கொண்டார். இதையடுத்து ராஜேஷும், அவரது காதலி கலைவாணியும் கைது செய்யப்பட்டனர்.
