தென் அமெரிக்க நாடான கொலம்பியாவில் பெருகிவரும் ஊழல், வேலையில்லாத் திண்டாட்டம், பாதுகாப்பு அச்சுறுத்தல் காரணமாக அந்நாட்டு அரசு மீது அதிருப்தி அடைந்துள்ள மக்கள் நாடு முழுவதும் போராட்டத்தில் குதித்துள்ளனர்.
போராட்டக்காரர்களுக்கும் காவல் துறையினருக்குமிடையே நடக்கும் மோதலில் இதுவரை மூன்று பேர் உயிரிழந்துள்ளனர். இதுகுறித்து விசாரணை மேற்கொள்ளப்படும் என கொலம்பியா அரசு உறுதியளித்துள்ளது.
தலைநகர் பொகோடாவில் போராட்டத்தைக் கட்டுப்படுத்தும் நோக்கில் ஊரடங்கு உத்தரவு பிறப்பிக்கப்பட்டுள்ளது. எனினும், இந்தத் தடையை மீறி அந்நகரில் இன்று அதிகாலை (உள்ளூர் நேரப்படி) போராட்டக்காரர்கள் போக்குவரத்து சேவைகளை முடக்க முயன்றனர். இதை அறிந்த காவல் துறையினர் கண்ணீர் புகைகுண்டுகளை வீசி அவர்களை விரட்டியடித்தனர்.
இதுவரையில் போராட்டங்கள் அமைதியான முறையிலே நடைபெற்று வருவதாகவும், நிலைமை கட்டுக்குள் இருப்பதாகவும் கொலம்பியா தேசிய காவல் துறை இயக்குநர் ஆஸ்கர் அதிஹோர்டுவா, உள்துறை அமைச்சர் நான்சி குடிரெஸும் தெரிவித்துள்ளனர்.
ஆனால், வரும் நாட்களில் இந்தப் போராட்டம் அதிகரிக்கலாம் என்று அஞ்சப்படுவதால், வெளிநாட்டவர்கள் இந்த போராட்டத்தில் பங்கேற்பதைத் தடுக்கும் நோக்கில், அண்டை நாடுகளுடனான எல்லையை கொலம்பியா மூடியுள்ளது.
கொலம்பியாவின் அண்டை நாடுகளான இகுவடார், சிலே, வெனிசுவேலா, பொலிவியா ஆகிய நாடுகளிலும் அரசுக்கு எதிராகப் போராட்டங்கள் நடைபெற்று வருகின்றன.
இதையும் படிங்க : சஜித் பிரேமதாச எதிர்க்கட்சித் தலைவராக வரவேண்டும் - இலங்கை தமிழர்கள்
