சென்னை: Viswa Dream World நிறுவனம் சார்பில் ஆர் விஜயலஷ்மி மற்றும் செல்லம்மாள் - குருசாமி G தயாரிப்பில், இயக்குநர் ரஜித் கண்ணா இயக்கும் திரைப்படம், “சாரா”. இந்த படத்தில் கதாநாயகியாக சாக்ஷி அகர்வால் மற்றும் கதாநாயகனாக விஜய் விஷ்வா ஆகியோர் நடிக்கின்றனர். இந்த நிலையில், இப்படத்தின் படப்பிடிப்பு இன்று பூஜையுடன் துவங்கியது.
இந்த நிகழ்வில் இசையமைப்பாளர் இளையராஜா கலந்து கொண்டு படக்குழுவினரை வாழ்த்தினார். இந்நிகழ்வில் இசையமைப்பாளர் கார்த்திக் ராஜா பேசியதாவது, “இங்கு வந்து வாழ்த்து தெரிவித்த அனைவருக்கும் நன்றி. வந்துள்ள அனைவருக்கும் விநாயகர் சதுர்த்தி வாழ்த்துக்கள். இந்த பூஜையை விளக்கேற்றி துவக்கி வைத்த என் தந்தைக்கு நன்றி. இந்தப் படம் அனைத்து உணர்வுகளையும் கொண்ட ஒரு வித்தியாசமான படமாக இருக்கும். கண்டிப்பாக ஒரு நல்ல படமாக உருவாகும் என்று நம்புகிறேன்” என கூறினார்.
கதாநாயாகன் விஜய் விஷ்வா பேசியதாவது, “அனைவருக்கும் விநாயகர் சதுர்த்தி வாழ்த்துக்கள். சாரா திரைப்படத்தின் பூஜைக்கு வந்திருக்கும் அனைவருக்கும் நன்றி. கார்த்திக் ராஜாவின் இசையில் நான் நடிக்கவுள்ளது மிகவும் பெருமையாக இருக்கிறது. இந்த திரைப்படத்தில் யோகிபாபுவுடன் இணைந்து முதன் முறையாக நடிக்கிறேன். மேலும் சாக்ஷி, பொன்வண்ணன், அம்பிகா, ரோபோ சங்கர் ஆகியோருடன் இணைந்து நடிப்பது மிகவும் மகிழ்ச்சி” என கூறினார்.
கதாநாயகி சாக்ஷி பேசியதாவது, “என்னை இந்த திரைப்படத்திற்கு தேர்வு செய்த இயக்குநருக்கு என் முதல் நன்றி. கார்த்திக் ராஜா, இளையராஜா மற்றும் வந்திருக்கும் அனைவருக்கும், பத்திரிகையாளர்களுக்கும் நன்றி. இந்தப் படம் ஒரு புதுமையான அனுபவம் தரும்” என கூறினார்
நடிகர் ரோபோ சங்கர் பேசியதாவது, “சாரா திரைப்படத்தின் துவக்க விழாவில் இருப்பது மகிழ்ச்சி. இசை மாமேதை மேஸ்ட்ரோ இளையராஜா, இயக்குநர் தயாரிப்பாளர் அனைவருக்கும் என் மனமார்ந்த வாழ்த்துக்கள். வந்திருக்கும் அனைவருக்கும் நன்றி, இந்தப் படம் மூலமாக விஜய் விஷ்வா, ஒரு நல்ல திரைப்படம் தருவார் என்ற நம்பிக்கை இருக்கிறது. அவருக்கும், படக்குழுவிற்கும் எனது வாழ்த்துக்கள்” என கூறினார்
இயக்குநர் ரஜித் கண்ணா பேசியதாவது, “ஒரு இக்கட்டான சூழலில், தனக்காக எல்லாவற்றையும் விட்டு வந்த காதலனையா, அல்லது தனக்காக வாழ்க்கையே தியாகம் செய்த நண்பனையா என நாயகி யாரை காப்பாற்றுகிறாள் என்பதே இந்த படத்தின் கதை. பல சண்டைக் காட்சிகளுடன் அனைவரும் ரசிக்கும் கமர்ஷியல் படமாக இப்படம் இருக்கும்.
விஜய் விஷ்வா நாயகனாக நடிக்கிறார். இந்த திரைப்படத்தில் யோகிபாபு, ரோபோ சங்கர் ஆகியோர் முக்கிய கதாப்பாத்திரத்தில் நடிக்கின்றனர். அனைவரும் இந்தப் படத்திற்கு ஆதரவு அளிக்க வேண்டும். பத்திரிகையாளர்கள் அனைவருக்கும் நன்றி” என கூறினார்
சாரா படத்தின் பணியாற்றும் தொழில்நுட்ப குழு விபரம்: தயாரிப்பாளர் - R விஜயலக்ஷ்மி மற்றும் செல்லம்மாள் - குருசாமி G, நடிகர்கள் - சாக்ஷி அகர்வால், விஜய் விஷ்வா, பொன்வண்ணன், அம்பிகா, யோகிபாபு, ரோபோ சங்கர். இயக்குநர் - ராஜித் கண்ணா, ஒளிப்பதிவு J. லக்ஷ்மன், எடிட்டர் - SP அஹமத், இசை - கார்த்திக் ராஜா, கலை இயக்குநர் - சுரேஷ் கல்லெறி, சண்டை பயிற்சியாளர் - மிரட்டல் செல்வா, பாடலாசிரியர் - சினேகன், அருண் பாரதி, தயாரிப்பு மேலாளர் - சுந்தரம் சிவம், புகைப்படம் - சுரேஷ், ஆடை வடிவமைப்பு - ராஜன், மேக்கப் - கரி சுல்தான், மக்கள் தொடர்பு - A ராஜா
இதையும் படிங்க: விஜய் ஆண்டனி மகள் உயிரிழப்பு... லோகேஷ் கனகராஜ், சரத்குமார், உள்ளிட்ட திரைத்துறையினர் இரங்கல்!
