கௌதம் வாசுதேவ் மேனன் இயக்கத்தில் மாதவன் நடிப்பில் 2001ஆம் பிப்ரவரி 2ஆம் தேதி ஆண்டு மின்னலே திரைப்படம் வெளியானது. இவர் இயக்கிய முதல் திரைப்படமே திரையுலகினர் மத்தியிலும், சினிமா ரசிகர்களிடமும் பெரும் வரவேற்பை பெற்றது. புதிய ட்ரெண்ட் உருவானது. இயக்குநர் வெற்றிமாறன் ஒரு பேட்டியில் “நான் உதவி இயக்குநராக இருந்த காலத்தில் மின்னலே படத்தின் கிளைமாக்ஸ் காட்சியில் வரும் இசை எனக்கு புத்துணர்ச்சியை தந்தது. நாங்கள் காதல் காட்சிகளை படமாக்கும் முன்னர் கௌதம் மேனன் படங்களின் காதல் காட்சிகளை பார்ப்போம். நான் புகைப்பழக்கத்தை கைவிட வாரணம் ஆயிரம் முக்கிய காரணமாக இருந்தது என்று கூறியிருப்பார்.
இப்படி பல வகையில் தனது திரைப்படங்களின் காட்சிகளின் மூலமாக பார்வையாளர்களிடத்தில் பெரும் தாக்கத்தை ஏற்படுத்தும் திறன் கொண்டவர் கௌதம் மேனன். இவரது திரைப்படங்களில் பெரும்பாலும் எளிதான கதை களமே இடம்பெற்றிருக்கும். சில படங்கள் வணிக ரீதியாக வெற்றி பெறாவிட்டாலும் அவரது காட்சியமைப்புகளை ரசிகர்கள் தங்களது மனதுக்கு நெருக்கமாக உணர்வதால் கௌதம் மேனனுக்கென தனி ரசிகர் பட்டாளம் இருந்து வருகிறது.
ஒரே மாதிரியான அனைத்து படங்களை இயக்குகிறார் என்று அவர் மீது விமர்சனங்கள் எழுந்தாலும், அவர் ஒவ்வொரு படங்களின் திரை மொழியிலும் பல விதமான மாற்றங்கள் இருக்கும். உதாரணத்திற்கு வேட்டையாடு விளையாடு, என்னை அறிந்தால் படத்தின் கதையில் ஒரு சில ஒற்றுமைகள் இருந்தாலும் திரைக்கதையில் நிறைய வித்தியாசங்கள் இருக்கும். கௌதம் மேனன் தனது எல்லைகளை தாண்டி வித்தியாசமான கதைக்களத்தோடு சமீபத்தில் சிலம்பரசனை வைத்து இயக்கிய படம் ’வெந்து தணிந்தது காடு'. இந்த படம் ரசிகர்கள் மத்தியிலும் பாக்ஸ் ஆபிஸ் வசூலிலும் நல்ல வரவேற்பை பெற்றது. இயக்குநர் மணிரத்னத்திற்கு பிறகு காதல் காட்சிகளுக்கு என வகுக்கப்பட்ட டெம்ளேட்களை உடைத்து, தனது கேஷ்வலான மாண்டேஜ் காதல் காட்சிகள் மூலம் பாடல்களுக்கு அழகு சேர்ப்பதில் கௌதம் மேனனிற்கு தமிழ் சினிமாவில் தனி இடமுண்டு .
மற்ற இயக்குநர்களின் ஹீரோவிற்கும், கௌதம் மேனன் பட ஹீரோவிற்கும் ஸ்டைலிஷான உடல் மொழி, வசன உச்சரிப்பு என பல மாற்றங்கள் இருக்கும். கமல் ஹாசன், சூர்யா, அஜித் ஆகிய நடிகர்களின் நட்சத்திர பிம்பத்திற்கு தனது கதையில் சமரசம் செய்து கொள்ளாமல் தனது கதைக்கு ஏற்ற கதாபாத்திரமாக அவர்களை மாற்றியிருப்பார். அப்பா - மகன் உறவு, காதல் காட்சிகள், உடற்பயிற்சி, போதைப்பழக்கம் என கௌதம் மேனன் கூறிய வாழ்வியல் கருத்துகள் கொண்ட வாரணம் ஆயிரம் இன்றளவும் இளைஞர்களின் ஃபேவரைட் படமாக உள்ளது
பல இயக்குநர்கள் தங்களுக்கு பிடித்த நடிகர்களை இயக்கும் ’ஃபேன் பாய்’ படங்கள் எத்தனை வந்தாலும் கௌதம் மேனன் கமல் ஹாசன் காம்போவில் வெளியான ‘வேட்டையாடு விளையாடு’ போன்ற ‘கிளாசிக் ஃபேன் பாய்’ திரைப்படம் இதுவரை வெளியாகவில்லை என்றே கூறலாம். கௌதம் மேனன் படங்களில் பெண் கதாபாத்திரங்களுக்கு ஹீரோக்களை விட அதிக முக்கியத்துவம் வாய்ந்ததாக அமைந்திருக்கும். இன்னும் சொல்லப்போனால் பெண் கதாபாத்திரத்தை மையமாக வைத்து அவரது கதைகள் அமையும். ஜெஸ்ஸி, மேக்னா, கீதா என கௌதம் மேனன் உருவாக்கிய பல பெண் கதாபாத்திரங்கள் மக்கள் பனதில் நீங்கா இடம் பிடித்திருக்கும். கௌதம் மேனன் தான் சொல்ல நினைக்கும் கதைகளை தனக்கே உரித்தான திரைமொழியில் இன்னும் பல படங்களில் கூற வேண்டும். "Happy Birthday GVM"
இதையும் படிங்க: ஏலே படத்தின் அழகியல் கிழித்தெறியப்பட்டுள்ளது - ஹலிதா ஷமீம் வேதனை!
