தமிழ் சினிமா யாரை எப்போது ஏற்றுக்கொள்ளும் என்று யாருக்கும் தெரியாது. அது அழகு, அந்தஸ்து எல்லாம் பார்க்காது. உனக்கு திறமையும் கடின உழைப்பும் இருந்தால் அங்கு கோலோச்சலாம். அதற்கு மிகப் பெரிய உதாரணமாக திகழ்பவர் தனுஷ். அப்பா கஸ்தூரி ராஜாவால் துள்ளுவதோ இளமை படத்தில் நாயகனாக அறிமுகமானார். அப்போது அவரை பார்த்த ரசிகர்கள் இதுஎல்லாம் ஒரு மூஞ்சியா என்று கிண்டல் செய்துள்ளனர்.
ஆனால், இதுகுறித்து தனுஷ் எதுவும் பேசவில்லை. பின்னர் அண்ணன் இயக்கிய காதல் கொண்டேன் திரைப்படத்தில் அசுரத்தனமான நடிப்பை வெளிப்படுத்தியிருந்தார். எந்த ரசிகர்கள் இவரை கிண்டல் செய்தார்களோ அவர்களே தனுஷின் நடிப்பை புகழ்ந்து தள்ளினர். இப்படத்தில் தனுஷின் நடிப்பை பார்த்து வியந்தவர்களில் ரஜினிகாந்தின் மூத்த மகள் ஐஸ்வர்யாவும் ஒருவர். அன்று முதல் தனுஷுக்கு ஏறுமுகம்தான்.
தனுஷும் ஐஸ்வர்யாவும் காதலிக்க தொடங்கினர். 2004ஆம் ஆண்டு இருவீட்டார் சம்மதத்துடன் திருமணம் செய்து கொண்டனர். இருவருக்கும் யாத்ரா, லிங்கா என்று இரண்டு மகன்கள் உள்ளனர். கிட்டத்தட்ட 18 ஆண்டுகள் ஒன்றாக வாழ்ந்து வந்த தனுஷ் மற்றும் ஐஸ்வர்யா ரஜினிகாந்த் இடையே திடீரென கருத்து வேறுபாடு ஏற்பட்டது.
இதனையடுத்து இருவரும் கடந்தாண்டு பிரிந்து வாழ்வதாக முடிவெடுத்தனர். இதனால் திரையுலகினர் மற்றும் ரசிகர்கள் அதிர்ச்சி அடைந்தனர். இருவரையும் சேர்த்து வைக்க ரஜினிகாந்த் உள்ளிட்ட குடும்பத்தினர் எடுத்த முயற்சியும் வீண்போனது. தற்போது இருவரும் பிரிந்து அவரவர் பணிகளில் பிஸியாக உள்ளனர். மகன்கள் இருவரும் கொஞ்ச நாள் தனுஷுடன் கொஞ்ச நாள் ஐஸ்வர்யா உடன் இருந்து வருகின்றனர்.
ரஜினிகாந்த் வசித்துவரும் போயஸ் கார்டன் பகுதியில் தனுஷ் ரூ.20 கோடி மதிப்பிலான இடம் ஒன்றை வாங்கியிருந்தார். இது தனது மனைவி ஐஸ்வர்யாவுக்காக வாங்கியிருந்தார் என்று கூறப்படுகிறது. காரணம் அருகிலேயே இருந்தால் அப்பா ரஜினியை நன்றாக பார்த்துக்கொள்ளலாம் என்ற ஐஸ்வர்யா திட்டமிட்டிருந்தாராம்.
ஆனால், எதிர்பாராத விதமாக இருவரும் பிரிந்துவிட்டனர். ஆனாலும் தனுஷ் ரூ.150 கோடி மதிப்பில் அந்த இடத்தில் புதிய வீடு ஒன்றை கட்டி முடித்துள்ளார். நவீன தொழில்நுட்பத்துடன் கூடிய அந்த வீட்டின் பூஜை சமீபத்தில் நடந்துள்ளது. இதில் ரஜினிகாந்த் குடும்பத்தில் இருந்து யாருக்கும் அழைப்பு இல்லையாம்.
தனுஷின் குடும்பத்தினர் மற்றும் நெருங்கிய நண்பர்களுக்கு மட்டும் அழைப்பு விடுக்கப்பட்டுள்ளது. இந்த வீட்டை தனது தாய் விஜயலட்சுமி மற்றும் தந்தை கஸ்தூரி ராஜாவுக்காக பார்த்து பார்த்து கட்டியுள்ளார். இந்த பூஜைக்கு சென்ற இயக்குனர் சுப்பிரமணியம் சிவா தனது சமூக வலைத்தள பக்கத்தில் இதுகுறித்து பதிவிட்டுள்ளார்.
அதில் தம்பி தனுஷின் புதிய வீடு. கோவில் உணர்வு எனக்கு. வாழும் போதே தாய், தந்தையை சொர்க்கத்தில் வாழ வைக்கும் பிள்ளைகள், தெய்வமாக உணரப்படுகிறார்கள்” என்று அவர் தெரிவித்துள்ளார். திரைபிரபலங்கள், ரசிகர்கள் என பலரும் தனுஷுக்கு வாழ்த்து தெரிவித்து வருகின்றனர்.
