ஐதராபாத் : 69வது பிலிம்பேர் விருது வழங்கும் விழா வரும் ஜனவரி 28ஆம் தேதி குஜராத்தில் நடைபெறுகிறது. ஒவ்வெரு ஆண்டும் இந்த மதிப்புமிகுந்த விழாவில் சிறந்த படங்கள், நடிகர்கள், நடிகைகள், தயாரிப்பு, கதை, சண்டை உள்ளிட்ட பல்வேறு பிரிவுகளின் கீழ் தேர்வு செய்யப்பட்டு விருதுகள் வழங்கப்படும்.
இந்தி சினிமாவின் மதிப்புமிக்க மற்றும் பழமையான விருது விழாவான பிலிம்பேர் விருது விழாவின் 69வது பதிப்பு நடப்பாண்டில் வரும் 28ஆம் தேதி குஜராத் மாநிலத்தின் காந்திநகரில் நடத்த திட்டமிடப்பட்டு உள்ளது. நடப்பாண்டின் பிலிம்பேர் விருது விழாவின் பரிந்துரை பட்டியலை அமைப்பின் நடுவர் குழு வெளியிட்டு உள்ளது.
சிறந்த நடிகருக்கான போட்டியில் ஷாருக்கான் இடம் பிடித்து உள்ளார. ஜவான் மற்றும் டங்கி ஆகிய இரண்டு படங்களுக்காக அவர் சிறந்த நடிகருக்கான பட்டியலில் பரிந்துரைக்கப்பட்டு உள்ளார். அண்மையில் வெளியான உண்மை சம்பவத்தை அடிப்படையாக கொண்டு எடுக்கப்பட்ட 12த் பெயில் திரைப்படமும் பல்வேறு தேர்வுகளுக்கு பரிந்துரைக்கப்பட்டு உள்ளது.
ஒட்டுமொத்தமாக பாலிவுட் நடிகர் ரன்பீர் கபூர் நடிப்பில் வெளியான அனிமல் திரைப்படம் 19 பிரிவுகளில் பரிந்துரைக்கப்பட்டு உள்ளது. சிறந்த திரைப்படத்திற்கான பட்டியலில் 12த் பெயில், அனிமல், ஜவான், Omg 2, பதான் உள்ளிட்ட படங்கள் தேர்வாகி உள்ளன. சிறந்த இயக்குநருக்கான பிரிவில் ஜவான் இயக்குநர் அட்லி இடம் பிடித்து உள்ளார்.
மற்றபடி தமிழ்நாடு சார்பில் சிறந்த கதைக்கான பிரிவில் ஜவான் படத்திற்காக அட்லியின் பெயர் பரிந்துரைக்கப்பட்டு உள்ளது. அதேபோல் சிறந்த இசை ஆல்பத்திற்கான பிரிவில் அனிருத்தின் பெயர் இடம் பெற்று உள்ளது. சிறந்த தயாரிப்பு டிசைன் பிரிவில் டி முத்துராஜ் மற்றும் சிறந்த ஒளிப்பதிவுக்கான பிரிவில் ஜவான் படத்திற்காக ஜி.கே. விஷ்னு ஆகியோரின் பெயர் பரிந்துரைக்கப்பட்டு உள்ளன.
இதையும் படிங்க : பொங்கலுக்கு அனல் பறக்க வெளியானது- நடிகர் விஜயின் The GOAT போஸ்டர்!
