குமரி மாவட்டத்தில், தேசிய ஜனநாகயகக் கூட்டணியில் பாஜக சார்பில் போட்டியிடும் பொன்.ராதாகிருஷ்ணன், நாகர்கோவில் சுற்றுவட்டாரப் பகுதிகளில் இன்று தீவுர பரப்புரையில் ஈடுபட்டு வருகிறார்.
பரப்புரைக்கிடையே அவர் செய்தியாளர்களை சந்தித்து, அவர்கள் கேட்ட பல்வேறு கேள்விகளுக்கு பதிலளித்து பேசினார்.
அப்போது, காங்கிரஸ் கட்சி சார்பாக போட்டியிடும் வசந்தகுமார், இவர் மீது வைத்த குற்றச்சாட்டு குறித்து எழுப்பப்பட்ட கேள்விக்கு, "நான் நாடாளுமன்றத்திற்கு இதுவரை ஏழு நாட்கள் மட்டுமே சென்றிருக்கிறேன் என வசந்தகுமார் கூறி வருகிறார், உண்மையில் கணக்கு தெரியாத ஒரு வேட்பாளரை போட்டியிட வைத்திருக்கிறது காங்கிரஸ். ஊடகங்களையும், நாடாளுமன்ற ரெக்கார்டுகளையும் ஆராய்ந்து பார்க்கச் சொல்லுங்கள், அதிகப்படியாக பாரளுமன்றம் சென்றதில் நான் முதல் இடத்தில் இருக்கிறேன்" என்று கூறினார்.
இதைத்தொடர்ந்து மேலும் பாஜக குறித்து பா.சிதம்பரம் தெரிவித்த கருத்து தொடர்பாக கேட்கப்பட்ட கேள்விக்கு, "முதலில் துறைமுகம் கொண்டு வர அனுமதிக்க மாட்டேன் என கூறிய அவர் தற்போது நான் துறைமுகத்திற்கு எதிரானவர் இல்லை என கூறி வருகிறார். இது யாரை ஏமாற்றும் செயல், 20 லட்சம் மக்களை ஏமாற்றப் பார்க்கிறது காங்கிரஸ்" என்றார்.
