வேலூரில் வணிகர் சங்கங்களின் பேரமைப்பு சார்பில் கொடி ஏற்றும் நிகழ்ச்சியில் கலந்து கொண்ட பின், செய்தியாளர்களிடம் பேசிய அதன் தலைவர் விக்கிரமராஜா, “ கரோனா காலத்திற்கான வணிகர்களின் 6 மாத வட்டியை ரத்து செய்ய வேண்டும், உள்ளாட்சி நகராட்சி கடைகளின் 6 மாத கால வாடகையை தள்ளுபடி செய்ய வேண்டும் என்ற கோரிக்கையை ஏற்று, 2 மாத தள்ளுபடியை முதலமைச்சர் அறிவித்தார். ஆனால் அதனை ஏற்க வேலூர் மாநகராட்சி ஆணையர் மறுக்கிறார். இது கண்டிக்கத்தக்கது.
இன்னும் 6 மாத காலத்திற்கு கடைகளுக்கு சீல் வைப்போ, வியாபாரிகளுக்கு அபராதமோ, சோதனை என்ற பெயரில் லஞ்சம் வாங்குவது போன்ற செயலிலோ அதிகாரிகள் ஈடுபடக்கூடாது. பெயர் பலகைகளில் தமிழுக்கு முன்னுரிமை அளித்து 10% ல், 5% இடத்தில் தமிழில் எழுத வணிகர்களுக்கு அறிவுறுத்தியுள்ளோம். ஜிஎஸ்டி கட்டுவதில் அதிக குளறுபடி உள்ளது. அதை அகற்றினால் தான் முறையாக ஜிஎஸ்டி தொடர்ந்து கட்ட முடியும்.
வரும் தேர்தலில் ஆட்சிக்கு யார் வர வேண்டும் என்பதை தீர்மானிப்பவர்களாக வியாபாரிகள் இருப்பார்கள். எங்களது கோரிக்கைகளை ஏற்று கட்டாயம் நிறைவேற்றும் கட்சிக்கு ஆதரவு அளிப்போம். அரசு பெரிய பெரிய நிறுவனங்களுக்கு வட்டியை தள்ளுபடி செய்துள்ளது போல், கரோனா கால இழப்பை சரி செய்யும் வகையில், வியாபாரிகளுக்கும் 6 மாத வட்டியை தள்ளுபடி செய்ய வேண்டும். 3 வேளாண் சட்டங்களை எதிர்த்து போராடி வரும் விவசாயிகளுக்கு எங்கள் ஆதரவு எப்போதும் இருக்கும் “ என்றார்.
இதையும் படிங்க: சில்லறை வணிகத்தில் கால் பதிக்க கார்ப்பரேட் நிறுவனங்கள் சதி!
