போதிய மழையின்மை, காவிரியில் நீர் இல்லாதது, ஹைட்ரோகார்பன் போன்ற பல்வேறு காரணங்களால் காவிரி டெல்டாவில் அண்மைக்காலமாக, நெல் சாகுபடியில் போதிய வருவாய் இல்லாமல் விவசாயிகள் அல்லல்பட்டுவருகின்றனர். எனவே, உழவர்கள் மாற்றுச்சாகுபடித் திட்டத்தை கையில் எடுக்க அரசும், வேளாண் ஆர்வலர்களும் தொடர்ந்து வலியுறுத்திவந்தாலும், அதனை ஒரு சில விவசாயிகள் மட்டுமே கடைப்பிடித்து வெற்றியாளர்களாகவும், பிறருக்கு எடுத்துக்காட்டாகவும் திகழ்ந்துவருகிறார்கள். அந்த வகையில் திருவாரூரை அடுத்த அரசவனங்காடு கிராமத்தில் 10 ஏக்கர் விவசாய நிலத்தில், ஆண்டுக்கு 20 லட்சம் வருமானம் ஈட்டிவருகிறார் கணேஷ் கமலக்கண்ணன் என்ற விவசாயி.
இளங்களை வணிகவியல் (பி.காம்.) பட்டதாரியான இவர், 2003ஆம் ஆண்டு தனது நிலத்தின் ஒரு பகுதியான சுமார் இரண்டு ஏக்கர் பரப்பளவில் பண்ணைக்குட்டை அமைத்து அதன் கரையோரங்களில் தென்னங்கன்றுகளை நட்டார். இந்தத் தொடக்கம் அவருக்குப் பல்வேறு சிந்தனையைத் தூண்டி தற்போது அந்தப் பண்ணைக்குட்டை ஜந்து ஏக்கராக விரிவடைந்துள்ளது. அதற்கேற்ப தென்னை மரங்களும் நூறாக அதிகரித்துவிட்டன.
மீன் பண்ணைக்குத் தேவையான தீவனச் செலவை குறைக்க கோழி வளர்ப்பிலும், ஆடு வளர்ப்பிலும் இறங்கியதன் பலனாக 300-க்கும் மேற்பட்ட நாட்டுக் கோழிகள், கருங்கோழி, வனராஜா, கிரிராஜா போன்ற உயர் ரக கோழிகள் இவரது ஒருங்கிணைந்த பண்ணையத்தில் வளர்க்கப்படுகின்றன. மேலும், தலைச்சேரி, போயர், செம்மறி என நூறு ஆடுகளையும் வளர்த்துவருகிறார்.
பண்ணைக்கு அருகிலேயே காய்கறித் தோட்டத்தையும் இரண்டு ஏக்கர் பரப்பளவில் அமைத்துள்ளார் கமலக்கண்ணன். அடுமட்டுமின்றி கூட்டுப் பண்ணையம் குறித்த பல்வேறு தரப்பினரின் கேள்விகளுக்கு விடையாக வேளாண் துறை அலுவலர்கள் அடையாளம் காட்டுவது கமலக்கண்ணனின் பண்ணையைத்தான். இப்படிப் பலரும் பின்தொடரும் வண்ணம் சுமார் 10 ஏக்கர் பரப்பளவில் விரிந்துள்ள இந்த ஒருங்கிணைந்த பண்ணையை மிடுக்கோடு செயல்படுத்திவருகிறார் விவசாயி கமலக்கண்ணன்.
இதையும் படிங்க: விவசாயிகளின் வாழ்க்கையில் திருப்பத்தை ஏற்படுத்திய கொரோனா
