தூத்துக்குடி ஒட்டப்பிடாரம் சட்டப்பேரவை தொகுதி இடைத்தேர்தல் திமுக வேட்பாளராக எம்.சி.சண்முகையா அறிவிக்கப்பட்டுள்ளார். திமுக வேட்பாளர் எம்.சி.சண்முகையாவை ஆதரித்து திமுக மாநில மகளிர் அணிச் செயலாளரும், தூத்துக்குடி நாடாளுமன்றத் தொகுதி திமுக வேட்பாளருமான கனிமொழி ஒட்டப்பிடாரம் சுற்றுவட்டாரப் பகுதிகளில் தேர்தல் பரப்புரை மேற்கொண்டார். அப்போது பேசுகையில்,
‘நடைபெற இருக்கின்ற நாடாளுமன்றத் தேர்தல், சட்டப்பேரவை தொகுதி இடைத் தேர்தல்களின் மூலம் தற்போது நடைபெற்றுக் கொண்டிருக்கின்ற கூடிய ஆட்சியை மாற்ற வேண்டிய கடமை நமக்கு இருக்கிறது. இத்தேர்தல்கள் மூலமாக மத்தியிலும், மாநிலத்திலும் நடைபெற்றுக் கொண்டிருக்கக் கூடிய மக்கள் விரோத ஆட்சியை நாம் அகற்ற வேண்டும். நீட் தேர்வைக் கொண்டுவந்து தமிழகத்தில் மாணவர்களின் கனவை எல்லாம் சிதைத்துவிட்டனர்.
அமைதியான முறையில் ஸ்டெர்லைட் ஆலைக்கு எதிராகப் போராடிய தூத்துக்குடி மக்கள் மீது துப்பாக்கிச் சூடு நடத்தி 13 பேரைச் சுட்டுக் கொன்றனர். இந்த அநீதிக்கு இன்று வரை நியாயம் கிடைக்கவில்லை. கலவரத்தால் பாதிக்கப்பட்டவர்கள் இன்றுவரை எழுந்து நடக்க முடியாத சூழல் உள்ளது. இளைஞர்களுக்கு வேலை வாய்ப்பு இல்லை. சிறு தொழில் வணிகம் எல்லாம் முடக்கப்பட்டுவிட்டது. நாடாளுமன்ற உறுப்பினர் தேர்தல் என்பது கடைக்குச் சென்று பெரிய பொருள் வாங்குவது போல. அந்த பொருளுக்கு இலவச இணைப்பாகக் கிடைக்கக் கூடியது தான் இந்த இடைத்தேர்தல். ஆகவே நடைபெற உள்ள தேர்தல் மூலமாக மத்தியில் இருக்கக் கூடிய பாஜகவையும் ஆட்சியையும், தமிழகத்தில் இருக்கும் அதன் பினாமி ஆட்சியையும் வீட்டுக்கு அனுப்ப வேண்டும்.’ என்று தேர்தல் உரை நிகழ்த்தினார்.
