காவிரி நீர்ப்பிடிப்புப் பகுதிகளில் பெய்து வரும் கனமழை காரணமாகக் கர்நாடக அணைகளிலிருந்து அதிகளவில் உபரி நீர் திறக்கப்பட்டுள்ளது. இதனால் கடந்த இரண்டு நாட்களாக மேட்டூர் அணைக்கான நீர்வரத்து தொடர்ந்து அதிகரித்து வந்த நிலையில் நேற்று இரவு முதல் உபரி நீர் போக்கியான 16 கண் பாலம் வழியாக டெல்டா பாசனத்திற்குத் தண்ணீர் திறக்கப்பட்டது
மேட்டூர் அணை இன்று நிரம்பிய நிலையில் பாதுகாப்பு ஏற்பாடுகளும், வெள்ளத் தடுப்பு நடவடிக்கைகள் குறித்தும் ஆய்வு செய்வதற்காகச் சேலம் மாவட்ட ஆட்சியர் ராமன் மேட்டூர் வந்தார். அப்போது, மேட்டூர் அணையின் 16 கண் மதகுகள் பகுதியில் பொதுப்பணித் துறை அலுவலர்களுடன் ஆய்வு நடத்தினார்.
பின்னர் செய்தியாளர்களிடம் பேசிய சேலம் மாவட்ட ஆட்சியர் ராமன், “கரையோரமுள்ள உள்ள அனைத்து மாவட்டங்களுக்கும் வெள்ள அபாய எச்சரிக்கை விடுக்கப்பட்டுள்ளது. வருவாய்த் துறை மூலமாகத் தாழ்வான பகுதிகளில் தண்டோரா மூலம் வெள்ள அபாய எச்சரிக்கை விடுக்கப்பட்டுள்ளது. சம்பந்தப்பட்ட கிராமங்களில் காவல் துறையினர் கண்காணிப்பு பணியில் ஈடுபட்டுள்ளனர்” என்று தெரிவித்தார்.
மேலும், மேட்டூர் அணையின் நீர்வரத்து, நீர் வெளியேற்றம் ஆகியன குறித்த தகவல்களை அனைத்து மாவட்ட ஆட்சியர்களுடன் பகிர்ந்து கொண்டு வருவதாகவும், தொடர்ந்து நிலைமையைக் கண்காணித்து வருவதாகவும், தண்ணீரைக் காண வரும் மக்கள், அதில் இறங்கிக் குளிக்கவோ, செல்ஃபி எடுத்துக்கொள்ளவோ கூடாது எனவும் கூறினார்.
