உலகம் முழுவதும் அக்டோபர் மாதம் மார்பக புற்று நோய் விழிப்புணர்வு மாதமாக கடைபிடிக்கப்படுவதை முன்னிட்டு, சேலம் அரசு மோகன் குமாரமங்கலம் மருத்துவக்கல்லூரி மருத்துவமனை கூட்டரங்கில், விழிப்புணர்வு நிகழ்ச்சி நடைபெற்றது. மாவட்ட ஆட்சியர் ராமன் தலைமையில் நடந்த இந்நிகழ்ச்சியில், மத்திய அரசின் தேசிய சுகாதார திட்ட கூடுதல் இயக்குநர் யுவராஜ், மாநில சுகாதார திட்ட இயக்குநர் செந்தில் ராஜ் ஆகியோர் கலந்து கொண்டனர்.
நிகழ்ச்சியில் பேசிய மாவட்ட ஆட்சியர் ராமன், ” இம்மாதம் முழுவதும் சேலம் மாவட்ட மக்களுக்கு விழிப்புணர்வு ஏற்படுத்தும் வகையில், அரசு மருத்துவக்கல்லூரி மருத்துவமனை சுற்று சுவர்களில், மார்பக புற்றுநோய் குறித்த விழிப்புணர்வு செய்திகள் அடங்கிய, 413 அடி நீள விளம்பர பேனர் அமைக்கப்பட்டுள்ளது.
அதில், மார்பக புற்றுநோய் எவ்வாறு ஏற்படுகிறது, அதனை எவ்வாறு கண்டறிவது, இதற்கான பரிசோதனைகள் மற்றும் சிகிச்சைகள் என்னென்ன என்பது குறித்தும், இந்நோயினை ஆரம்ப நிலையிலேயே கண்டறிந்தால் முற்றிலும் குணமாக்க முடியும் என்பதை அறிவுறுத்தும் விதமாகவும் செய்திகள் இடம்பெற்றுள்ளன.
நமது மருத்துவமனையில் கடந்த 2018 முதல் செப்டம்பர் 2020வரை, 858 பெண்களுக்கு மார்பக புற்றுநோய் இருப்பது அறியப்பட்டு, உரிய சிகிச்சைகள் அளிக்கப்பட்டுள்ளன. மேலும் மார்பக புற்றுநோய்க்கான கீமோதெரபி சிகிச்சை 2,200 பெண்களுக்கும், கதிரியக்க சிகிச்சை 250 பெண்களுக்கும் அளிக்கப்பட்டுள்ளன. மாவட்டத்தில் உள்ள 30 வயதிற்கு மேற்பட்ட பெண்கள், புற்றுநோய் மற்றும் பொது அறுவை சிகிச்சைத்துறையை அணுகி, மார்பக புற்றுநோய் இருக்கின்றதா என்பதற்கான பரிசோதனைகளை செய்து கொள்ள வேண்டும் “ என்று கேட்டுக்கொண்டார்.
இந்நிகழ்ச்சியில், மருத்துவக்கல்லூரி மருத்துவமனை முதல்வர் ஆர்.பாலாஜிநாதன், இணை இயக்குநர் மலர்விழி வள்ளல் உட்பட மருத்துவர்கள், செவிலியர்கள், பணியாளர்கள் கலந்து கொண்டனர்.
இதையும் படிங்க: தேங்காய் சிரட்டையில் கலைநயம் - கைவினையில் அசத்தும் கல்லூரி மாணவி!
