‘கையாலாகாதவர்களே முதலமைச்சரை விமர்சிக்கிறார்கள்!’

மதுரை: தமிழ்நாடு முதல்வர் எடப்பாடி பழனிசாமியின் வெளிநாட்டுப் பயணம் குறித்து கையாலாகாதவர்களே விமர்சனம் செய்கின்றனர் என்று வருவாய்த்துறை அமைச்சர் ஆர்.பி. உதயகுமார் தெரிவித்துள்ளார்.

மதுரை உலகத்தமிழ்ச் சங்க வளாகத்தில் தமிழ் வளர்ச்சித்துறை சார்பாக இளந்தமிழர் இலக்கியப் பட்டறை நிகழ்வு ஆகஸ்ட் 18ஆம் தேதி தொடங்கி நடைபெற்று வந்தது. அதன் நிறைவு நாளான இன்று, தமிழ்நாடு முழுவதிலிருந்தும் 270க்கும் மேற்பட்டோர் பங்கேற்றுள்ளனர். அவர்களுக்கு அமைச்சர் ஆர்.பி. உதயகுமார் சான்றிதழும், பரிசுகளும் வழங்கினார்.

பின்னர் செய்தியாளர்களை சந்தித்த அவர், 'முன்னாள் முதலமைச்சர் ஜெயலலிதாவின் வழியில் உலக முதலீட்டாளர்கள் மாநாட்டை அண்மையில் மிகச் சிறப்பாக தமிழ்நாடு அரசு நடத்தியது. அதன் தொடர்ச்சியாக லண்டன், அமெரிக்கா போன்ற வல்லரசு நாடுகளுக்கு நேரிலே சென்று அங்குள்ள முதலீட்டாளர்கள் மற்றும் தமிழ் முதலீட்டாளர்களை சந்திக்க உள்ளார். இதன் மூலம் தமிழ்நாட்டின் எதிர்காலத்திற்கு, வேலைவாய்ப்பிற்கு தொடர்ந்து உத்தரவாதம் அளிக்கும் வகையிலான பணிகளை மேற்கொண்டு வருகிறார். ஆகையால், இந்த விவகாரத்தில் கையாலாகாதவர்களின் விமர்சனத்தை நாங்கள் ஒரு பொருட்டாக எடுத்துக் கொள்வதில்லை.

தென்மேற்குப் பருவமழையின்போது கிடைக்கக்கூடிய மழையை முறையாகச் சேமித்துப் பயன்படுத்த வேண்டும் என்ற நோக்கத்தில் நீர்நிலைகளைத் தூர்வார குடிமராமத்துத் திட்டத்திற்காக முதற்கட்டமாக ரூ.100 கோடி ஒதுக்கியது. அதையடுத்து இரண்டாம் கட்டமாக 1550க்கும் மேற்பட்ட ஏரிகளைச் சீரமைப்பதற்காக ரூ. 321 கோடியும், மூன்றாவது கட்டமாக ரூ. 500 கோடியும் தமிழ்நாடு அரசு ஒதுக்கியுள்ளது. அரசாணை எண் 50இன்படி நீர்நிலைகளில் படிந்துள்ள வண்டல்மண்ணை வயல்களில் உரமாகப் பயன்படுத்துவதற்கும் மண்பாண்டங்கள் செய்வதற்கும் பயன்படுத்திக் கொள்ள தமிழ்நாடு முதலமைச்சர் உத்தரவிட்டுள்ளார். விதிமுறைகளுக்கு உட்பட்டுதான் இந்த வண்டல்மண் அள்ளப்பட்டு வருகின்றன. இதில் எந்தவித முறைகேடும் நடக்க வாய்ப்பில்லை. முறைகேடுகளைக் கண்காணிப்பதற்காக அலுவலர்களும் நியமிக்கப்பட்டுள்ளனர்' என்றார்.