மதுரை: பாலமேடு ஜல்லிக்கட்டு இன்று (ஜனவரி 15) மிகக் கோலாகலமாக நடைபெற்று முடிந்துள்ளது. இந்நிலையில் ஏழு சுற்றுகளில் நிறைவாக அதிக காளைகளைப் பிடித்த இரண்டாவது சிறந்த வீரராகத் தேர்வுசெய்யப்பட்ட மதுரை - மேலமடையைச் சேர்ந்த கார்த்திக் ராஜா செய்தியாளரிடம் பேசினார்.
அப்போது பேசிய அவர், "நான் அடித்தட்டு குடும்பத்தைச் சேர்ந்த சாதாரண நபர். காளை மாடுகளைப் பிடிக்கும் லாவகம் குறித்துப் பல்வேறு கடுமையான பயிற்சிகளை மேற்கொண்டு நான் போட்டிகளில் பங்கேற்றுவருகிறேன். என்னுடைய நண்பர்களின் உதவி இல்லாமல் நான் இந்தச் சாதனைபுரிந்திருக்க முடியாது.
வெற்றியாளரைத் தீர்மானிக்கும் அரசியல்!
பொதுவாக ஜல்லிக்கட்டு நடைபெறும்போது வெற்றிபெற்றவர்கள் குறித்த அறிவிப்பில் பல்வேறு குளறுபடிகள் இப்போதும் உள்ளன. அரசியல் பலம், ஆள் பலம்தான் யார் பரிசு பெற வேண்டும் என்பதைத் தீர்மானிக்கிறது. இதன்மூலம் அடித்தட்டிலிருந்து வருகின்ற என்னைப் போன்ற நபர்கள் பெரிதும் பாதிக்கப்படுகின்றனர். வருங்காலத்தில் இதுபோன்ற நிலை மாற வேண்டும்" என்றார்.
சிறந்த மாடுபிடி வீரருக்கான முதல் பரிசை வென்ற பொதும்பு கிராமத்தைச் சேர்ந்த பிரபாகரனும் இதேபோன்ற குற்றச்சாட்டை முன்வைத்தார். "கடந்தாண்டு நான் அதிக காளைகளைப் பிடித்தபோதும்கூட தனக்கு முதல் பரிசு வழங்கவில்லை, இரண்டாம் பரிசு என அறிவித்தார்கள்.
அப்போது அதனை நிராகரித்துவிட்டு விழாவைப் புறக்கணித்துச் சென்றேன். இதுபோன்ற நிலை எதிர்காலத்தில் தொடரக் கூடாது என்பதே என்னைப் போன்ற மாடுபிடி வீரர்கள் கருத்து" எனத் தெரிவித்தார்.
இதையும் படிங்க: பொங்கல் தொகுப்பு கரும்பில் முறைகேடு? - அரசு கவனிக்குமா...!
