திருநெல்வேலி மாவட்டம் சங்கரன் கோவிலைச் சேர்ந்த செந்தில் முருகன் உள்ளிட்ட நான்கு பேர் உயர்நீதிமன்ற மதுரைக் கிளையில், பொதுநல மனு தாக்கல் செய்திருந்தார். அதில், "கடந்த மார்ச் ஒன்றாம் தேதி அன்று, கணினி ஆசிரியர்கள் பணியிடங்களுக்கான இணையதளம் மூலம் தேர்வு நடத்தப்படும் என்று அறிவிக்கப்பட்டிருந்தது. இத்தேர்விற்கு நானும் விண்ணப்பித்திருந்தேன். கடந்த ஜூன் 23ஆம் தேதி அன்று, எனக்குத் தென்காசி ஆலங்குளத்தில் உள்ள மரியம் பாலிடெக்னிக் கல்லூரியில் தேர்விற்கான மையம் ஒதுக்கப்பட்டது. காலை 7.30 மணிக்குத் தேர்வு மையத்திற்குச் சென்றேன்.
இடைப்பட்ட நேரத்தில் சில தேர்வர்கள் கணினியிலிருந்த விடைகளைக் குறித்துக் கொண்டு மற்றவர்களிடம் பகிர்வதும். விடைகளுக்குக் குறிப்பெடுப்பதுமாக இருந்தனர். மேலும் சிலர் கைப்பேசி மூலம் விடைகளைப் பிறருக்குப் பகிர்ந்து கொண்டிருந்தனர். இதனால் வினாக்கள் தேர்வுக்கு முன்னதாகவே கசிந்தது. போதிய கணினி வசதி இல்லாமல் தேர்வர்கள் மிகுந்த சிரமத்திற்குள்ளானார்கள், இங்கு நடந்த முறைகேடுகள் அனைத்தும் படம் பிடிக்கப்பட்டு சமூக வலைத்தளங்களில் அதிகம் உலாவியது.
இச்சம்பவம் குறித்த செய்திகள் பல ஊடகங்களிலும் வெளியாயின. இது போன்ற சூழலால் சில தேர்வு மையங்களில் இரவு 8மணி வரை தேர்வு நடந்தது. இந்நிலையில் ஜூன் 24ஆம் தேதி அன்று ஆசிரியர் தேர்வாணையம் வெளியிட்ட அறிவிப்பில், இணைய சேவை பாதிக்கப்பட்டதால் தேர்வெழுத இயலாமல் போனவர்களுக்கு 2ஆம் கட்டமாக ஜூன் 27ஆம் தேதி தேர்வு நடைபெறும் என அறிவித்துள்ளது.
அதிலும் மூன்று தேர்வு மையங்களுக்கு மட்டுமே மறு தேர்வு நடைபெறுவதாகக் கூறியுள்ளது. ஆனால் பல தேர்வு மையங்களில் இது போன்ற முறைகேடு நடைபெற்றுள்ளது. அதோடு இரண்டு வகை வினாக்களுக்குத் தேர்வு எழுதினால் தேர்வின் தரம் பாதிப்பதுடன், தேர்வு முடிவுகளிலும் குளறுபடி ஏற்பட வாய்ப்புள்ளது. இதுகுறித்து தேர்வாணையத்திற்குப் புகாரளித்தும் எவ்வித நடவடிக்கையும் எடுக்கப்படவில்லை.
எனவே நடைபெற்ற இரு தேர்வுகளுக்குமான முடிவை அறிவிக்க இடைக் கால தடை விதித்தும், இது தொடர்பாக ஒரு விரிவான விசாரணை நடத்த ஆசிரியர் தேர்வாணையத்திற்கு உத்தரவிட்டு, நடைபெற்ற இரு தேர்வினையும் ரத்து செய்து 119 தேர்வு மையங்களுக்கும் முறையான மறு தேர்வு நடத்தப்பட வேண்டும்" எனக் கூறியிருந்தார்.
இந்த வழக்கு நீதிபதி கிருஷ்ணக்குமார் முன் புதன்கிழமையன்று விசாரணைக்கு வந்தது. மனுதாரரின் கோரிக்கை குறித்து ஆசிரியர் தேர்வாணையம் பதிலளிக்கக் கூறி வழக்கு விசாரணையை இரண்டு வாரங்களுக்கு ஒத்திவைத்தார்.
