ஈரோடு: நகர்ப்புற உள்ளாட்சித் தேர்தலை முன்னிட்டு பறக்கும் படை அலுவலர்கள் தீவிர வாகன தணிக்கை மேற்கொண்டுவருகின்றனர். இந்நிலையில் ஈரோடு மாவட்டம் புஞ்சை புளியம்பட்டி நகராட்சிக்குள்பட்ட பகுதிகளில், நேற்று (பிப்ரவரி 2) அதிகாலை பறக்கும் படை அலுவலர் செல்வம் தலைமையில், குழுவினர் வாகன தணிக்கை மேற்கொண்டனர்.
அப்போது கர்நாடக மாநிலத்திலிருந்து கேரளா நோக்கிச் சென்ற காரை தடுத்து நிறுத்தி சோதனையிட்டதில், காரில் வந்த ஐந்து நபர்களிடம் ரூ.51,000 பணம், நகைகள் இருந்தன. பின்னர் இது குறித்து விசாரணை மேற்கொண்டதில், “திருநெல்வேலி அச்சன்புதூர் பகுதியைச் சேர்ந்த சமீர், கேரள மாநிலம் கொல்லம் பகுதியைச் சேர்ந்த சர்புதீன், முகமது இஸ்மாயில், ஷாஜகான், சுபேர் என்பதும், இவர்கள் கர்நாடக மாநிலம் மைசூருவிலிருந்து கவரிங் நகைகள் வாங்கிச் செல்வதாகக் கூறியுள்ளனர்.
இதையடுத்து பறக்கும் படையினர் பறிமுதல்செய்த பணம், நகைகளை புஞ்சைபுளியம்பட்டி நகராட்சி ஆணையாளரிடம் ஒப்படைத்தனர். தொடர்ந்து அவர்கள் கொண்டுவந்த நகையை நகை மதிப்பீட்டாளர் மூலம் சோதனை செய்ததில் அது கவரிங் நகை எனத் தெரியவந்தது. இதையடுத்து பறிமுதல்செய்யப்பட்ட கவரிங் நகைகள் மீண்டும் அவர்களிடம் ஒப்படைக்கப்பட்டது.
மேலும் பறிமுதல்செய்யப்பட்ட ரூ.51,000 மட்டும் சத்தியமங்கலம் சார்நிலைக் கருவூலத்தில் ஒப்படைக்கப்பட்டது. உரிய ஆவணத்தை காண்பித்து பணத்தைத் திருப்பிப் பெற்றுக் கொள்ளுமாறு அவர்களுக்கு அறிவுறுத்தப்பட்டது.
