கோயம்புத்தூர்: குனியமுத்தூரை சேர்ந்த நகை தொழிலாளி யு.எம்.டி ராஜா. இவர் 75ஆவது சுதந்திர தினவிழாவை முன்னிட்டு தன் கண்ணில் தேசிய கொடியை வைத்து அசத்தியுள்ளார். முட்டையின் ஓட்டில் கீழ் உள்ள மெல்லிய வெள்ளை(தண்ணீர் போன்ற படலம்) படத்தை எடுத்து அதில் தேசிய கொடி கொடியை வண்ணங்களால் வரைந்து அதனை கண்ணின் வெள்ளை விழியில் ஒட்டியுள்ளார்.
இது குறித்து அவர் கூறுகையில், “வருடம் தோறும் சுதந்திர தினவிழாவை முன்னிட்டு, பல்வேறு வகையில் ஓவியங்கள் வரைந்து வருகிறேன். அதன்படி 75 ஆவது சுதந்திர தினவிழாவை முன்னிட்டு மக்கள் முன்பு ஒரு கலை படைப்பை தர வேண்டும் என்பதற்காக சிந்திக்கும் போது, பள்ளி பருவத்தில் படித்த "தேசிய கொடியை கண்ணிமை போல் காப்போம்" என்ற வார்த்தை மனதில் தோன்றியது.
அதை வைத்து கண்ணுக்குள் தேசிய கொடி ஓவியம் வரைய முடிவு செய்தேன். அதற்காக முயற்சி செய்தேன், அதனை முயற்சிக்கும் போது பல்வேறு சிரமங்கள் ஏற்பட்டன. கண் மருத்துவரிடம் இது குறித்து ஆலோசனை மேற்கொண்ட போது, அவரும் இது போன்று செய்ய வேண்டாம் என அறிவுரை வழங்கினார்.
இருப்பினும் அதனை செய்து முடிக்க வேண்டுமென ஆர்வம் இருந்து கொண்டே இருந்தது. சுதந்திர போராட்ட வீரர்கள் நமக்கு வாங்கி கொடுத்த சுதந்திர நினைவுகள் என்னை வேலை செய்ய விடாமல் தடுத்தது. எனவே மீண்டும் முயற்சி செய்தேன், அப்போது முட்டை ஓட்டில் கருவிற்கு மேல் லேசான படலத்தில் வரையலாமென எண்ணம் தோன்றியது.
அதனை எடுத்து அந்த படலத்தை வெட்டி எடுத்து கண்ணில் வைத்த பொழுது அது கண்ணோடு சேர்ந்தது. பின்னர் அதில் எனாமல் பெயிண்ட் கொண்டு தேசியக் கொடியை வரைந்து கண்ணில் வைத்தேன். அதுவும் கண்ணோடு ஒட்டியது. இருப்பினும் அது சரியாக ஒட்டாமல் கண்ணிற்குள் சுருண்டு விட்டது.
இதுபோன்று 15, 16 முறை தோல்வி அடைந்து அதன் பின் கண்ணில் உள்ள வெள்ளை வெளியில் அதனை வைத்த பொழுது அது மிகச் சரியாக அமைந்தது. அப்பொழுது சுதந்திரம் கிடைத்தது போல் மகிழ்ச்சி அடைந்தேன். அதே சமயம் குழந்தைகள் சிறுவர்கள் பள்ளி கல்லூரி மாணவர்கள் இதுபோன்று முயற்சியில் ஈடுபட வேண்டாம்”, என தெரிவித்தார்.
பிரதமர் அண்மையில் கூறிய அனைவருக்கும் வீடுகளிலும் தேசிய கொடி ஏற்றுங்கள் என்பதை பொதுமக்களிடம் விழிப்புணர்வு ஏற்படுத்தும் வண்ணம் குண்டு பல்பில் 75 ஆவது சுதந்திர தின ஓவியத்தை வரைந்து உள்ளார். மேலும், தீக்குச்சியில் நீளத்திற்கு தங்கத்தில் வீட்டின் முன்பு ஒருவர் தேசிய கொடியை ஏற்றுவது போல வடிவமைத்துள்ளார், என்பது குறிப்பிடத்தக்கது.
இதையும் படிங்க: சுதந்திர தினவிழா: 'அனைவரது வீடுகளிலும் தேசியக்கொடி ஏற்றுங்கள்' - கோவை கலெக்டர் வேண்டுகோள்!
