23 வருடங்களுக்குப் பிறகு நாடாளுமன்றத்தில் உரையாற்றிய பின், தமிழ்நாடு திரும்பிய மதிமுக பொதுச்செயலாளர் வைகோவிற்கு சென்னை விமான நிலையத்தில் அக்கட்சி தொண்டர்கள் உற்சாக வரவேற்பு அளித்தனர்.
இதனைத் தொடர்ந்து செய்தியாளர்களுக்கு பேட்டி அளித்த வைகோ, “ 23 ஆண்டுகளுக்குப் பிறகு நான் நாடாளுமன்ற உறுப்பினராகியுள்ளேன். இந்த வாய்ப்பை எனக்கு கொடுத்த திமுக தலைவர் ஸ்டாலின் அவர்களுக்கு நன்றியைக் கூறிக்கொள்கிறேன். கேரள மாநில நாடாளுமன்ற உறுப்பினர்கள் மற்றும் ஆம் ஆத்மி உறுப்பினர்கள் அனைவரும் என்னை வரவேற்றார்கள். நான் மோடியை விமர்சித்தாலும் நான் பேசும்போது அவர் மேஜையைத் தட்டி வரவேற்றது எனக்கு நெகிழ்ச்சியடைய வைத்தது.
கர்நாடகாவில் மிகப்பெரிய ஜனநாயக படுகொலை நடைபெற்றுக்கொண்டு இருக்கிறது. அவர்கள் ஜனநாயகத்தைப் பற்றிப் பேசுவதற்கு அருகதையே கிடையாது. இன்னும் எத்தனை நாளைக்குக் கர்நாடகாவில் குதிரை பேர ஆட்சி நடக்கிறது என்று பொறுத்திருந்து தான் பார்க்க வேண்டும். ஹைட்ரோகார்பன் திட்டத்தை எதிர்த்து கடுமையாகப் பேசினேன். இந்த மூன்று நாட்களில் பல மசோதாக்களை நிறைவேற்ற இருக்கிறார்கள். நாளை மாலை டெல்லி செல்கிறேன் பாராளுமன்றத்தில் முக்கியமாக முத்தலாக் மசோதா குறித்துப் பேச இருக்கிறேன்.
நீண்ட நாட்களுக்குப் பிறகு நாடாளுமன்றத்துக்கு சென்றாலும் கவலையோடு தான் சென்றேன். ஆனால், நாடாளுமன்ற உறுப்பினர்கள் என்னை ஊக்குவித்தது எனக்கு மகிழ்ச்சி அளிக்கிறது. இன்று அப்துல் கலாம் நினைவு நாள் ஆகும். ’எதிரி அடிக்கும்போது தாங்கிக் கொண்டே இரு உனக்கு வாய்ப்பு கிடைக்கும்போது திருப்பி அடி’, என்று அப்துல்கலாம் சொல்லியிருக்கிறார். அதேபோல் நான் இருப்பேன் என அவர் தெரிவித்தார்.
