தமிழ்நாட்டில் பன்னிரெண்டாம் வகுப்புத் தேர்வு முடிவுகள் ஏப்ரல் 19ஆம் தேதி வெளியானது. இதனையடுத்து பத்தாம் வகுப்புத் தேர்வு முடிவுகள் எப்போது வெளியாகும் என எதிர்பார்க்கப்பட்டது.
மொத்தம் ஒன்பது லட்சம் மாணவ, மாணவிகள் தேர்வு எழுதியுள்ளனர். விடைத்தாள்கள் திருத்தும் பணிகள் ஏப்ரல் 1ஆம் தேதி தொடங்கி 16ஆம் தேதியுடன் முடிவடைந்தது.
இந்நிலையில், பத்தாம் வகுப்புத் தேர்வு முடிவுகள் ஏப்ரல் 29ஆம் தேதி காலை 9.30 மணிக்கு வெளியிடப்படும் என தேர்வுத்துறை இயக்ககம் அறிவித்துள்ளது.
- http://tnresults.nic.in,
- www.dge1.tn.nic.in,
- www.dge2.tn.nic.in
ஆகிய இணைய முகவரிகளில் தேர்வு எண், பிறந்த நாள் ஆகியவற்றைப் பதிவுசெய்து மதிப்பெண்களை தெரிந்துகொள்ளலாம். மேலும், தாங்கள் பதிவுசெய்த கைப்பேசி எண் மூலம் தேர்வு முடிவுகளை குறுஞ்செய்தியாகவும் பெற்றுக்கொள்ளலாம்.
மேலும், தற்காலிக மதிப்பெண் சான்றிதழ்களை மே 2ஆம் தேதி முதல் பள்ளி மாணவர்கள் தாங்கள் பயின்ற பள்ளியின் தலைமை ஆசிரியர் மூலமாகவும், தனித்தேர்வர்கள் தாங்கள் தேர்வு எழுதிய மையத்தின் தலைமையாசிரியர் மூலமாகவும் பெற்றுக் கொள்ளலாம்.
மே 6ஆம் தேதி முதல் பள்ளி மாணவர்களும் தனித்தேர்வர்களும் தற்காலிக மதிப்பெண் சான்றிதழ்களை தங்களின் பிறந்த தேதி மற்றும் பதிவு எண் ஆகிய விவரங்களை அளித்து www.dge.tn.nic.in என்ற இணையதளத்தில் இருந்தும் பதிவிறக்கம் செய்து கொள்ளலாம் என தேர்வுத் துறை இயக்ககம் சார்பில் தெரிவிக்கப்பட்டுள்ளது.
