தேனி மாவட்டம் கம்பத்தில் எம்ஜிஆர் பிறந்தநாள் விழா பொதுக்கூட்டத்தில் கலந்துகொள்ள நேற்றிரவு, தேனி நாடாளுமன்ற உறுப்பினர் ரவீந்திரநாத் குமார் அவரது காரில் சென்றார். கம்பம் பகுதியில் அவரது கார் வந்துகொண்டிருந்தபோது, இஸ்லாமிய அமைப்பினர் திடீரென்று அவருக்கு கறுப்புக்கொடி காட்டி போராட்டம் நடத்தினர்.
மேலும், குடியுரிமை திருத்தச் சட்டத்திற்கு எதிராகவும், அதிமுகவிற்கு எதிராகவும் கோஷங்களை எழுப்பினர். இதனால் அந்த பகுதியில் சிறிது நேரம் பரபரப்பு நிலவியது.
பின்னர், ரவீந்திரநாத் குமாருக்கு கறுப்புக்கொடி காட்டப்பட்டதை எதிர்த்து அதிமுக மற்றும் பாஜகவினர் சாலை மறியல் போராட்டம் நடத்தினர்.
இந்நிலையில், தேனி நாடாளுமன்ற உறுப்பினர் ரவீந்திரநாத் குமார் இன்று வெளியிட்டுள்ள அறிக்கையில், ’அமைதியான தேனி மாவட்டத்தில் அமைதியின்மையை உருவாக்கி வன்முறையைத் தூண்டுவதற்காக சிலரால் மேற்கொள்ளப்பட்ட, திட்டமிடப்பட்ட எதிர்மறையான பரப்புரைக்கு கடுமையான கண்டனத்தை தெரிவித்துக் கொள்கிறேன். இத்தகைய தவறான பரப்புரை செய்பவர்களின் வலையில் மக்கள் யாரும் விழுந்துவிட வேண்டாம் ” என குறிப்பிட்டுள்ளார்.
இதையும் படிங்க: ஓபிஎஸ் மகன் ஓபிஆர் எம்.பி.க்கு எதிராக இஸ்லாமியர்கள் கருப்புக் கொடி; காரை முற்றுகையிட்டதால் பரபரப்பு!
