சென்னை:சென்னை புளியந்தோப்பு கே.பி.பார்க் பகுதியில் 2016இல் 112 கோடி ரூபாய் செலவில் 1,920 வீடுகள் கொண்ட அடுக்குமாடிக் குடியிருப்புகள் கட்டப்பட்டன.
இவை தரமற்றவையாக இருப்பதாக குடியிருப்புவாசிகள் புகார் தெரிவித்ததால், ஐஐடி குழு ஆய்வு செய்து அறிக்கை அளித்தது.
அதில், தரமற்ற வகையில் குடியிருப்பைக் கட்டிய பி.எஸ்.டி. கட்டுமான நிறுவனத்தைத் தடை பட்டியலில் சேர்க்கவும், அந்த நிறுவனத்திற்கு இனி அரசு ஒப்பந்தங்கள் வழங்கக் கூடாது எனவும் தெரிவிக்கப்பட்டுள்ளது.
இந்த அறிக்கையின் அடிப்படையில், பி.எஸ்.டி நிறுவனத்துக்கு எதிராக நகர்ப்புற வாழ்விட மேம்பாட்டு வாரியம், நோட்டீஸ் அனுப்பியது. அதில், ஏன் தடை பட்டியலில் இந்நிறுவனத்தை சேர்க்கக் கூடாது என விளக்கம் அளிக்க அந்த நிறுவனத்திற்கு உத்தரவிட்டது.
மறு சீரமைப்புப் பணிகள் முடிந்தன
இந்த நோட்டீஸை எதிர்த்து பி.எஸ்.டி. நிறுவனம் தாக்கல் செய்த வழக்கு நீதிபதி ஆனந்த் வெங்கடேஷ் முன் விசாரணைக்கு வந்த போது, 93 விழுக்காடு சரி செய்யும் பணிகள் முடிந்து விட்டதாகவும் பி.எஸ்.டி.நிறுவனத்தின் தரப்பில் தெரிவிக்கப்பட்டது.
இதை ஏற்ற நீதிபதி, நிறுவனத்தைத் தடை பட்டியலில் சேர்த்து பணிகள் மேற்கொள்ளத் தடை விதித்ததால் அது சீரமைப்புப் பணிகளை ஸ்தம்பிக்கச் செய்து விடும் எனக் கூறி, அந்நிறுவனத்திற்கு எதிரான அறிக்கைக்கு இடைக்காலத் தடை விதித்து உத்தரவிட்டு இருந்தார்.
இந்நிலையில் வழக்கு இன்று மீண்டும் விசாரணைக்கு வந்தபோது, நகர்ப்புற வாழ்விட மேம்பாட்டு வாரியம் தாக்கல் செய்த மனுவில், ஏற்கெனவே அந்த நிறுவனத்துடன் செய்து கொண்ட ஒப்பந்தத்தில், பிரச்னைகள் (Aribitration center) என்று சொல்லக்கூடிய சமரச மையத்தில் மூலம் தீர்த்துக் கொள்ளப்படும் எனத் தெரிவிக்கப்பட்டுள்ளது.
எனவே, உயர் நீதிமன்றம் இந்த வழக்கை விசாரிக்கத் தேவையில்லை என்று தெரிவிக்கப்பட்டது.
ஆனால் நீதிபதி, இந்த வழக்கை உயர் நீதிமன்றமே விசாரிக்கும், சமரச மையம் விசாரிக்கத் தேவையில்லை என்று கூறி அந்த கோரிக்கையை நிராகரித்தார்.
வழக்கு மீதான விசாரணையைப் பிப்ரவரி 2ஆம் தேதிக்கு ஒத்தி வைத்துள்ளார்.
இதையும் படிங்க:கர்நாடக முன்னாள் முதலமைச்சர் பி.எஸ்.எடியூரப்பாவின் பேத்தி தற்கொலை
