கரோனா தொற்றில் இருந்து தற்காத்துக் கொள்ள கண்டிப்பாக முகக் கவசம் அணிய வேண்டும் என உலக சுகாதார நிறுவனம் அறிவுறுத்தியுள்ளது. இதனடிப்படையில், மூன்று லேயர்கள், N95, மருத்துவமனைகளில் பயன்படுத்தப்படுபவை, பருத்தி, வெட்டி வேர் ஆகியவற்றால் செய்யப்பட்டவை என, பலவகை முகக் கவசங்கள் விற்கப்பட்டு வருகின்றன.
இவை மட்டுமின்றி மக்களைக் கவரும் வகையில் உருவங்கள் அச்சிடப்பட்ட பல்வேறு முகக் கவசங்களும் அறிமுகமாகியுள்ளன.
இந்நிலையில், முகக் கவசங்களை பயன்படுத்த வேண்டிய கால அளவு குறித்தும், அவற்றின் விலை, தரம், காலாவதியாகும் தேதி ஆகியவற்றுக்கான விதிகளை உருவாக்கக் கோரியும் மேற்கு மாம்பலத்தை சேர்ந்த ரமணி என்பவர், உயர் நீதிமன்றத்தில் வழக்குத் தொடர்ந்துள்ளார்.
அந்த மனுவில், ”முகக்கவசம் தொடர்பான தெளிவான விதிமுறைகளை அரசு அறிவிக்கவில்லை என்றால், முகக் கவசத்தை யார் வேண்டுமானலும் உற்பத்தி செய்து, அவர்கள் விருப்பப்பட்ட விலைக்கு, ரசீது ஏதுமின்றி விற்கும் சூழல் உருவாகும்” எனத் தெரிவித்துள்ளார்.
மேலும், எந்தெந்த முகக் கவங்களை எந்தெந்த வயதினர் அணிய வேண்டும், உற்பத்தி, விலை, தரம், காலாவதி காலம் உள்ளிட்டவை அடங்கிய முகக்கவச விதிமுறைகளை வெளியிட வேண்டும் எனவும், அதுவரை முகக்கவசம் அணியாமல் செல்பவர்களிடம் அபராதம் வசூலிப்பதற்கு தடை விதிக்க வேண்டும் எனவும் தனது மனுவில் அவர் குறிப்பிட்டுள்ளார்.
மேலும், முகக்கவசத்தை பயன்படுத்துவது, பயன்படுத்திய பின்னர் அதை பாதுகாப்பாக அப்புறப்படுத்துவது ஆகியவை குறித்து பள்ளி, கல்லூரி மாணவர்களுக்கு விழிப்புணர்வு ஏற்படுத்த வேண்டும் எனவும் கோரியுள்ளார்.
இந்த மனுவை விசாரித்த நீதிபதிகள் வினீத் கோத்தாரி, சுரேஷ் குமார் ஆகியோர் அடங்கிய அமர்வு, இம்மனுவிற்கு இன்னும் இரண்டு வாரங்களில் பதிலளிக்கும்படி மத்திய, மாநில அரசுகளுக்கு உத்தரவிட்டு, விசாரணையைத் தள்ளி வைத்தது.
இதையும் படிங்க: கரோனா: உலக அளவில் 4ஆவது இடத்தில் இந்தியா!
