விடுதலைச் சிறுத்தைகள் கட்சி சார்பில் ’விழி’ எனும் வானொலி தொடக்க விழா சென்னை அசோக் நகரிலுள்ள அக்கட்சி அலுவலத்தில் தலைவர் திருமாவளன் தலைமையில் நடைபெற்றது.
இதில் கலந்துகொண்டு பேசிய இந்திய கம்யூனிஸ்ட் கட்சியின் மூத்த தலைவர் நல்லக்கண்ணு, ”விஞ்ஞானத்தில் சந்திரமண்டலத்தையே தொடுகின்ற அளவுக்கு நாடு வளர்ந்திருக்கின்றது. அதே வேளையில் ஒரே நாடு, ஒரே மொழி, ஒரே ரேஷன் என்றெல்லாம் வரும்போது இந்திய நாட்டில் ஒரே சாதி என்றும் மாறவேண்டும். அதுமட்டுமல்லாது செத்தாலும் அடக்கம் செய்யும் இடம் ஒரே இடமாக இருக்க வேண்டும்.
130 கோடி பேர், 33 மாநிலங்கள், 27 மொழிகள் பேசுகின்ற மக்கள், வெவ்வேறு உணவு பழக்கம் கொண்டவர்கள் என பலதரப்பட்டவர்கள் வாழும் இடத்தில் ஒரே ரேஷன் என்று கூறுபவர்களுக்கு; ஒரே சாதி என்று கூற தைரியம் ஏன் இல்லை. அனைத்து மக்களுக்கும் ஒரே சுடுகாடு என்றும் ஏன் இதுவரை அவர்கள் கூறவில்லை.
130 கோடி மக்களை 130 பிரிவினராக வைத்துவிட்டு அனைவரும் ஒன்று எனச்சொல்லி ஏமாற்றுவதை முறியடிக்கும் பொறுப்பு நம் அனைவருக்கும் இருக்கிறது. அதை திறமையாய் செய்து வரக்கூடியவர் தொல்.திருமாவளவன்” என்றார்.
