சென்னை: தமிழ்நாடு சட்டப்பேரவைக்கு நடைபெற்ற 16ஆவது பொதுத்தேர்தலில் 133 தொகுதிகளை வென்று திமுக ஆட்சியை கைப்பற்றியது. இதையடுத்து, இன்று காலை ஆளுநர் மாளிகையில் முதலமைச்சர், பிற அமைச்சர்களின் பதவியேற்பு விழா தொடங்கியது.
கரோனா தடுப்பு நடவடிக்கையாக குறைந்த அளவிலான பங்கேற்பாளர்களை கொண்டு மிக எளிமையாக பதவியேற்பு விழா நடைபெற்று வருகிறது..
ஸ்டாலின் காலை 9 மணியளவில் ஆளுநர் மாளிகைக்கு வருகை புரிந்தார். அதன்பின் வருகை தந்த ஆளுநர் பன்வாரிலால் புரோஹிதிடம், மு.க.ஸ்டாலின் அமைச்சர்களை அறிமுகம் செய்துவைத்தார்.
அதிமுக ஒருங்கிணைப்பாளர் ஓ. பன்னீர் செல்வம், தமிழ்நாடு காங்கிரஸ் கமிட்டி தலைவர் கே.எஸ்.அழகிரி, ப.சிதம்பரம், மதிமுக பொதுச்செயலாளர் வைகோ, பாஜக சார்பில் இல.கணேசன், தமிழக வாழ்வுரிமைக் கட்சி தலைவர் வேல்முருகன், மமக தலைவர் ஜவாஹிருல்லா, மநீம தலைவர் கமல்ஹாசன், சமக தலைவர் சரத்குமார் ஆகிய முக்கிய தலைவர்கள் இவ்விழாவில் கலந்துகொண்டனர்.
விழா மேடையில் தமிழ்நாடு ஆளுநர் பன்வாரிலால் புரோகித், மு.க.ஸ்டாலின், தலைமைச் செயலாளர் ராஜீவ் ரஞ்சன் மட்டுமே இடம்பெற்றுள்ளனர்.
திமுக தலைவர் மு.க.ஸ்டாலினுக்கு முதலமைச்சராக பதவிப்பிரமாணம் செய்து வைக்குமாறு ஆளுநர் பன்வாரிலால் புரோஹித்துக்கு தலைமைச் செயலாளர் வேண்டுகோள் விடுத்தார்.
முதலில் முதலமைச்சராக திமுக தலைவர் மு.க.ஸ்டாலின் பதவிப்பிரமாணமும், ரகசியகாப்பு பிரமாணமும் எடுத்துக்கொண்டார். "முத்துவேல் கருணாநிதி ஸ்டாலின் எனும் நான்" என்று ஸ்டாலின் தன்னுடைய உறுதிமொழியை தொடங்கினார்.
அவருக்குபின் வரிசையாக அமைச்சர்கள் பதவிப்பிரமாணமும், ரகசிய காப்பு பிரமாணமும் செய்து வருகின்றனர். பதவியேற்ற பின் ஸ்டாலினுக்கும், அமைச்சர்களுக்கும் மற்றவர்கள் பூங்கொத்து வழங்க அனுமதி மறுக்கப்பட்டுள்ளது.
முதலமைச்சராக பதவியேற்ற மு.க.ஸ்டாலின் தலைமையில் இன்று மாலை 4 மணிக்கு அமைச்சரவைக் கூட்டம் நடைபெற இருக்கிறது. அதன்பின், கரோனா தடுப்பு நடவடிக்கைகள் குறித்து மாவட்ட ஆட்சியர்கள், கண்காணிப்பு அலுவலர்கள் ஆகியோருடன் கூட்டம் நடத்த திட்டமிடப்பட்டுள்ளது.
