சென்னை மாநகராட்சிக்கு உட்பட்ட குடிசைப் பகுதிகளில் தொண்டு நிறுவனங்களுடன் இணைந்து மக்களுக்கு முகக் கவசம் மற்றும் கரோனா குறித்த விழிப்புணர்வு ஏற்படுத்தும் பணி இன்று முதல் தொடங்கியது. நொச்சிக்குப்பத்தில் இன்று இப்பணிகளை கரோனா தடுப்பு சிறப்பு அலுவலர் டாக்டர் ராதாகிருஷ்ணன் மற்றும் மாநகராட்சி ஆணையர் பிரகாஷ் ஆகியோர் ஆய்வு செய்தனர்.
பின்னர் செய்தியாளர்களைச் சந்தித்த ராதாகிருஷ்ணன், “சென்னையில் கரோனாவால் இறப்போர் விகிதம் 0.7% ஆக உள்ளது. ஆலந்தூர், பெருங்குடி, சோழிங்கநல்லூர் போன்ற இடங்களில் நோய்த் தொற்று குறைந்து வருகிறது. கோயம்பேட்டில் தொற்றை ஓரளவு கட்டுப்படுத்திவிட்டோம். இருப்பினும், கோயம்பேடு சந்தையுடன் தொடர்பில் இருந்தவர்களை கண்டுபிடித்து சோதனை செய்து வருகிறோம். கரோனா அதிகமுள்ள ராயபுரம், திரு.வி.க.நகர், வளசரவாக்கம் போன்ற பகுதிகளில் நோய் பரவலை தடுக்க நடவடிக்கை எடுக்கப்பட்டு வருகிறது.
மொத்தமுள்ள 200 வார்டுகளில் 36 வார்டுகளில் தான் அதிக நோய் பரவல் இருக்கிறது. அதை தடுப்பதற்காகவே, மக்களுக்கு விழிப்புணர்வு ஏற்படுத்த 97 தொண்டு நிறுவனங்களோடு இணைந்து மாநகராட்சி செயலாற்றி வருகிறது “ என்றார்.
தொடர்ந்து பேசிய மாநகராட்சி ஆணையர் பிரகாஷ், "சென்னையில் 140 அரசு சுகாதார நிலையங்கள் உள்ளன. அங்கு வரும் நோயாளிகளின் பட்டியலை தனியாக எடுத்து வைத்துள்ளோம். சுமார் 1.15 லட்சம் பேருக்குத் தேவையான மருந்து, மாத்திரைகள் கொடுக்கப்பட்டுள்ளன. சென்னையில் 60 வயதுக்கு மேற்பட்டோர் சுமார் 8 லட்சம் பேர் உள்ளனர். அவர்களின் உடல் நிலையை 4 நாட்களுக்கு ஒருமுறை தொடர்பு கொண்டு விசாரிக்க 200 பேர் பணியாற்றி வருகின்றனர் " எனத் தெரிவித்தார்.
இதையும் படிங்க: சென்னையில் 10 ஆயிரத்தை நெருங்கும் கரோனா பாதிப்பு!
