சென்னை: வன்னியர்களுக்கு 20 விழுக்காடு இட ஒதுக்கீடு கோரி டிசம்பர் முதல் வாரத்தில், அனுமதியின்றி போராட்டத்தில் ஈடுபட்ட வன்னியர் சங்கம் மற்றும் பாட்டாளி மக்கள் கட்சியினர் மீது நடவடிக்கை எடுக்கக்கோரி, இந்திய மக்கள் மன்றத்தின் தலைவர் வாராகி, சென்னை உயர் நீதிமன்றத்தில் பொது மனு தாக்கல் செய்திருந்தார்.
அந்த மனு நீதிபதிகள் சத்தியநாராயணன், பொங்கியப்பன் அமர்வில் இன்று (டிசம்பர் 18) விசாரணைக்கு வந்தது.
அப்போது, மனுதாரர் தரப்பில் வழக்கறிஞர் சண்முகம் ஆஜராகி, 4 நாட்கள் போராட்டத்துடன் இது முடிந்துவிடவில்லை என்றும், கிராம நிர்வாக அலுவலகங்கள் முன் போராட்டம் நடத்தப்படும் என வன்னியர் சங்கங்கள், பாமக திட்டமிட்டுள்ளதாகவும், ஏற்கனவே நடந்த போராட்டத்தில் ரயில் மீது கல்வீசி தாக்குதல் நடத்தியது தொடர்பாக காவல்துறை வழக்கு மட்டுமே பதிந்துள்ளதாகவும், முன்னெச்சரிக்கை கைது ஏதும் செய்யவில்லை எனவும் வாதிட்டார். நீதிபதிகள் நியமனத்திலும் இடஒதுக்கீடு கோரி இரண்டு நாட்களுக்கு முன் உயர் நீதிமன்றம் முன்பு ஆர்ப்பாட்டம் நடந்ததாகவும் வாராகி தரப்பில் வாதிடப்பட்டது.
அப்போது, நீதிபதிகள், குற்ற விசாரணை நடைமுறைப்படி முன்னெச்சரிக்கை கைது நடவடிக்கையில் ஈடுபட காவல்துறைக்கு அதிகாரம் வழங்கப்பட்டு உள்ளதாகவும், பொது சொத்துக்களை பாதுகாப்பதற்காக தமிழ்நாடு அரசு சட்டம் இயற்றியுள்ளதாகவும் குறிப்பிட்டு, அவற்றின் அடிப்படையில் நடவடிக்கை எடுக்க வேண்டிய சரியான தருணம் இது என்றும் நீதிபதிகள் தெரிவித்தனர்.
எதிர்காலத்தில் இதுபோன்ற சம்பவங்கள் நடக்காமல் காவல்துறை செயல்படும் என எதிர்பார்ப்பதாக தெரிவித்த நீதிபதிகள், போராட்டத்தின் போது ரயில் மீது கல்லெறிந்த சம்பவம் நடைபெற்றுள்ளதால், வழக்கில் தெற்கு ரயில்வே பொது மேலாளரை தாமாக முன்வந்து எதிர்மனுதாரராக சேர்த்தனர்.
பின்னர் இந்த மனுவுக்கு, மத்திய, மாநில அரசுகள், தெற்கு ரயில்வே, வன்னியர் சங்கம், பாமக ஆகியவை பதிலளிக்கும்படி உத்தரவிட்டு, விசாரணையை மார்ச் 12ஆம் தேதிக்கு தள்ளி வைத்தனர்.
இதையும் படிங்க: தடையை மீறி எருது கட்டு திருவிழா... காவல்துறை வழக்குப் பதிவு
