நாட்டில் பயணிகள் வாகனங்களுக்கான தேவை இல்லாததால் இந்தியாவின் மிகப்பெரிய கார்கள் உற்பத்தி நிறுவனமான மாருதி சுசுகி தொடர்ந்து 8ஆவது மாதமாக அதன் உற்பத்தியைக் குறைக்கும் சூழ்நிலைக்குத் தள்ளப்பட்டுள்ளது.
நிறுவனத்தின் மொத்த வாகன உற்பத்தியின் எண்ணிக்கை 2018ஆம் ஆண்டு அக்டோபரில் ஒரு லட்சத்து 50ஆயிரத்து 497 (1,50,497 ) ஆக இருந்த நிலையில், இந்த ஆண்டு அக்டோபரில் ஒரு லட்சத்து 19ஆயிரத்து 337 (1,19,337) ஆக குறைந்துள்ளது.
பயணிகள் வாகனங்களின் உற்பத்தி எண்ணிக்கை கடந்த ஆண்டு அக்டோபரில், ஒரு லட்சத்து 48 ஆயிரத்து 318 (148,318) ஆக இருந்து, தற்போது ஒரு லட்சத்து 17 ஆயிரத்து 383 (117,383) குறைந்துள்ளது. அதேபோன்று வேன் வாகனங்களின் உற்பத்தி எண்ணிக்கை 2018 அக்டோபரில் 13ஆயிரத்து 817 (13,817) ஆக இருந்தது, இந்த ஆண்டு அக்டோபரில் அது, 7ஆயிரத்து 661 (7,661) ஆக குறைந்துள்ளது.
ஆல்டோ, எஸ்-பிரஸ்ஸோ, ஓல்டு வேகன்ஆர் போன்ற சிறிய வாகனங்களின் உற்பத்தி எண்ணிக்கை, கடந்த ஆண்டு 34 ஆயிரத்து 295 ஆக (34,295) இருந்த நிலையில் தற்போது 20 ஆயிரத்து 985 (20,985) ஆக குறைந்துள்ளது.
நியூ வேகன்ஆர், செலெரியோ, இக்னிஸ், ஸ்விஃப்ட், பலேனோ, ஓஇஎம் மாடல், டிசைர் போன்ற மாடல்களைக் கொண்ட காம்பாக்ட் பிரிவில், 74 ஆயிரத்து 167 (74,167) ஆக இருந்த எண்ணிக்கை, தற்போது 64 ஆயிரத்து 79 (64,079) ஆக குறைந்துள்ளது.
ஜிப்சி, விட்டாரா பிரெஸ்ஸா, எர்டிகா, எக்ஸ்எல் - 6, எஸ்-கிராஸ் போன்ற வாகனங்கள் மட்டுமே உற்பத்தி எண்ணிக்கையில் கடந்தாண்டு அக்டோபரில் 22 ஆயிரத்து 526இல் (22,526) இருந்து, 22 ஆயிரத்து 736 (22,736) ஆக சிறிய வளர்ச்சியைக் கண்டுள்ளது.
ஆல்டோ மற்றும் எஸ்-பிரஸ்ஸோ போன்ற மினி கார்களின் விற்பனையில் சரிவு காணப்பட்டாலும், நியூ வேகன்ஆர், செலிரியோ, இக்னிஸ், ஸ்விஃப்ட், பலேனோ மற்றும் டிசைர் உள்ளிட்ட கார்கள் ஆண்டுக்கு 16 விழுக்காடு வளர்ச்சியைக் கண்டுள்ளதாக தெரிய வந்துள்ளது.
இதையும் படிங்க: வாடிக்கையாளர்களை தொடர்ந்து ஈர்த்துவரும் பஜாஜ் ஃபின்செர்வ்!
