கோவை மற்றும் மதுரை மண்டல வருமான வரித்துறை ஆணையராக இருந்து வருபவர் ராஜீவ் விஜய்நாபர். அண்மையில் கோவை மாவட்டத்தில் அமலில் இருந்த கரோனா ஊரடங்கில் தளர்வளிக்கப்பட்டதைத் தொடர்ந்து, டெல்லியில் இருந்து விமானம் மூலம் கோவை வந்து அலுவலக பணிகளை மேற்கொண்டு வந்தார்.
கோவை மாவட்டத்தில் கரோனா பரவலைக் கட்டுப்படுத்த மாவட்ட நிர்வாகம் முன்னெடுத்துவரும் முன்னெச்சரிக்கை பணிகளில் தொடர்ந்து ஈடுபட்டு வந்துள்ளதாக அறிய முடிகிறது.
கடந்த சில நாள்களாக காய்ச்சல், சளியால் கடுமையாக பாதிக்கப்பட்டிருந்த அவர் நேற்று (ஜூலை 10) உடல் நிலை மோசமான நிலையில், பி.எஸ்.ஜி மருத்துவமனையில் சேர்க்கப்பட்டுள்ளார்.
கோவை பி.எஸ்.ஜி மருத்துவமனையில் மேற்கொள்ளப்பட்ட கரோனா கண்டறிதல் பரிசோதனையில் அவருக்கு கரோனா உறுதி செய்யப்பட்டது.
இதனையடுத்து அவர் சிகிச்சைக்காக அதே மருத்துவமனையில் அனுமதிக்கப்பட்டுள்ளார். அவரது குடும்பத்தினர் தற்போது சுகாதாரத் துறையினரின் கண்காணிப்பில் வைக்கப்பட்டுள்ளனர்.
முன்னதாக, ஜூலை 9ஆம் தேதி நடைபெற்ற ஆலோசனை கூட்டத்தில் அவருடன் கலந்து கொண்ட 16 வருமான வரித்துறை அலுவலர்களையும் தனிமைப்படுத்தி கொள்ளுமாறு சுகாதாரத்துறையினர் அறிவுறுத்தியுள்ளனர்.
கோவை மண்டல வருமான வரித்துறை அலுவலகம் கிருமிநாசியால் சுத்தம் செய்யப்பட்டது. மேலும், ஆலோசனை கூட்டத்தில் கலந்து கொண்ட 16 வருமான வரித்துறை அலுவலர்களுக்கும் சளி மாதிரிகள் எடுக்கப்பட்டு பரிசோதனைக்காக அனுப்பப்பட்டுள்ளது.
கோவை வருமான வரித்துறை ஆணையருக்கு கோவிட்-19 பாதிப்பு உறுதி செய்யப்பட்டிருப்பது அம்மாவட்ட மக்களை அதிர்ச்சிக்குள்ளாக்கி உள்ளது.
