புதுச்சேரி : கரோனா காரணமாக, கல்வி நிலையங்கள் திறக்கப்படாமல், ஆன்லைன் மூலம் வகுப்புகள் நடைபெற்றன. பின்னர் கரோனா குறையத் தொடங்கியதால், கல்வி நிலையங்கள் அனைத்தும் படிப்படியாக திறக்கப்படுகின்றன.
இதனைத்தொடர்ந்து 1 முதல் 8ஆம் வகுப்பு வரை பள்ளிகள் திறக்க அறிவிக்கப்பட்டிருந்த நிலையில், மழை வெள்ளம் காரணமாக, பள்ளிகள் திறப்பு ஒத்தி வைக்கப்பட்டிருந்தது. தற்போது மழை குறைந்ததால், புதுச்சேரியில் இன்று (டிசம்பர்.06) 1 முதல் 8ஆம் வரை பள்ளிகள் திறக்கப்படும் என புதுச்சேரி கல்வித்துறை அமைச்சர் நமச்சிவாயம் தெரிவித்திருந்தார்.
மதிய உணவு வழங்கப்படும்
இதுகுறித்து கல்வித்துறை அமைச்சர் நமச்சிவாயம் செய்தியாளர்களைச் சந்தித்து கூறியதாவது, "1 முதல் 8ஆம் வகுப்பு வரையிலான மாணவர்களுக்கு அரைநாள் மட்டுமே பள்ளிகள் இருக்கும். அதுவும் ஒரு நாள் விட்டு ஒரு நாள் என்ற முறையில் பள்ளிகள் இயங்கும்.
ஏற்கெனவே ஒன்பதாம் வகுப்பு முதல் கல்லூரி மாணவர்களுக்கு கல்வி நிறுவனங்கள் அரைநாள் செயல்பட்டு வரும் நிலையில், இன்று முதல் முழு நாள் இயக்கப்படும். அவர்களுக்கு மட்டும் மதிய உணவு வழங்கப்படும். வருகைப் பதிவேடு என்பது இருக்கும். விருப்பமுள்ளவர்கள் பள்ளிகளுக்கு வரலாம். வர விருப்பம் இல்லாதவர்களுக்கு ஆன்லைன் மூலம் வகுப்புகள் எடுக்கப்படும்'"என்றார்.
அதன்படி, புதுச்சேரியில் 1 முதல் 8ஆம் வகுப்பு வரையிலான மாணவர்களுக்கு 8 மாதங்களுக்கு பிறகு இன்று பள்ளிகள் திறக்கப்பட்டது.
