டெல்லி: பிரதமர் மோடி நாளை (செப்.24) தமிழ்நாடு, ராஜஸ்தான், தெலங்கானா, ஆந்திரா, கர்நாடகா, பிகார், மேற்கு வங்கம், கேரளா, ஒடிசா, ஜார்கண்ட் மற்றும் குஜராத் ஆகிய 11 மாநிலங்களில் உள்ள மத மற்றும் சுற்றுலாத் தலங்களை இணைக்கும் 9 புதிய வந்தே பாரத் ரயில்களை வீடியோ கான்பிரன்சிங் மூலம் கொடியசைத்து தொடங்கி வைக்க உள்ளார்.
புதிய வந்தே பாரத் ரயில்கள் இயக்கப்படும் வழித்தடங்கள்: உதய்பூர் - ஜெய்ப்பூர், திருநெல்வேலி - மதுரை - சென்னை, ஹைதராபாத் - பெங்களூரு, விஜயவாடா - சென்னை (ரேணிகுண்டா வழியாக), பாட்னா - ஹவுரா, காசர்கோடு - திருவனந்தபுரம், ரூர்கேலா - புவனேஸ்வர் - பூரி, ராஞ்சி - ஹவுரா, ஜாம்நகர் - அகமதாபாத் ஆகிய வழித்தடங்களில் இந்த 9 புதிய வந்தே பாரத் ரயில்கள் இயக்கப்பட உள்ளன.
இந்த ரயில்கள், நாடு முழுவதும் இணைப்பை மேம்படுத்துதல் மற்றும் ரயில் பயணிகளுக்கு உலகத்தரம் வாய்ந்த வசதிகளை வழங்குதல் ஆகிய பிரதமரின் தொலைநோக்குப் பார்வையை நினைவாக்குவதன் ஒரு படியாகும் எனவும், வந்தே பாரத் ரயில்கள் இயக்கப்படும் வழித்தடங்களில் அது வேகமான ரயிலாக இருக்கும் எனவும், பயண நேரத்தை கணிசமாக மிச்சப்படுத்த உதவும் எனவும் அதிகாரப்பூர்வ அறிக்கை ஒன்றில் தெரிவிக்கப்பட்டுள்ளது.
வந்தே பாரத் ரயிலால் எவ்வளவு நேரம் மிச்சப்படுத்தப்படும்? ரூர்கேலா - புவனேஸ்வர் - பூரி மற்றும் காசர்கோடு - திருவனந்தபுரம் ஆகிய வழித்தடத்தில் உள்ள தற்போதைய அதிவேக ரயிலுடன் ஒப்பிடும்போது, வந்தே பாரத் ரயில்கள் அந்தந்த இடங்களுக்கு இடையிலான பயண நேரத்தை சுமார் மூன்று மணிநேரம் குறைக்கும். ஹைதராபாத் - பெங்களூரு 2.5 மணி வழித்தடத்தில் நேரத்திற்கும் மேலாகவும், திருநெல்வேலி - மதுரை - சென்னை வழித்தடத்தில் 2 மணி நேரத்திற்கும் மேலாக பயண நேரம் மிச்சமாகும் எனவும் அந்த அறிக்கையில் தெரிவிக்கப்பட்டு உள்ளது.
ராஞ்சி - ஹவுரா, பாட்னா - ஹவுரா, ஜாம்நகர் - அகமதாபாத் இடையேயான வந்தே பாரத் ரயிலின் பயண நேரம், இந்த வழித்தடங்களின் இடையே தற்போது இயக்கப்படும் அதிவேக ரயில்களுடன் ஒப்பிடும்போது சுமார் ஒரு மணிநேரம் குறைவான பயண நேரத்தில் இலக்கை அடையும் எனவும், உதய்பூர் - ஜெய்ப்பூர் இடையே பயண நேரம் சுமார் அரை மணி நேரம் குறைவாக இருக்கும் எனவும் அந்த அறிக்கையில் தெரிவிக்கப்பட்டு உள்ளது.
வந்தே பாரத் ரயிலால் இணைக்கப்படும் வழிபாட்டுத் தலங்கள்: ரூர்கேலா - புவனேஸ்வர் - பூரி மற்றும் திருநெல்வேலி - மதுரை - சென்னை நகரங்களுக்கு இடையே இயக்கப்படும் வந்தே பாரத் ரயில்கள் பூரி மற்றும் மதுரை நகரங்களை இணைக்கும். மேலும், விஜயவாடா - சென்னை வந்தே பாரத் ரயில், ரேணிகுண்டா வழித்தடத்தில் இயக்கப்பட்டு, திருப்பதி பயணத்திற்கான இணைப்பை வழங்கும். இந்த வந்தே பாரத் ரயில்களின் அறிமுகம், நாட்டில் புதிய தரமான ரயில் சேவையை அளிக்கும் என்று அந்த அறிக்கையில் கூறப்பட்டுள்ளது.
கவாச் தொழில்நுட்பம் உள்ளிட்ட உலகத்தரம் வாய்ந்த வசதிகள் மற்றும் மேம்பட்ட பாதுகாப்பு அம்சங்களுடன் கூடிய இந்த ரயில்கள், சாதாரண மக்கள், தொழில் வல்லுநர்கள், வணிகர்கள், மாணவர்கள் மற்றும் சுற்றுலாப் பயணிகளுக்கு நவீன, விரைவான மற்றும் வசதியான பயணத்தை வழங்குவதற்கான முக்கிய படியாக இருக்கும் எனவும் அதில் தெரிவிக்கப்பட்டுள்ளது.
இதையும் படிங்க: விண்ணை முட்டும் விமான டிக்கெட் விலையேற்றம்..! இந்தியா - கனடா பதற்றம் காரணமா..?
