பெங்களூரு: நித்தியானந்தா மீது 2010ஆம் ஆண்டு தொடரப்பட்ட பாலியல் பலாத்கார வழக்கில், ராம் நகர் மூன்றாம் கூடுதல் மாவட்ட மற்றும் செஷன்ஸ் நீதிமன்றம் அதிரடி உத்தரவு ஒன்றை நேற்று (ஆக. 20) பிறப்பித்துள்ளது. இந்த வழக்கின் விசாரணை நிறைவடைந்த நிலையில்,. மூன்று சாட்சிகளையும் குறுக்கு விசாரணை செய்யப்பட்டுவிட்டது. இருப்பினும், குற்றஞ்சுமத்தப்பட்ட நித்தியானந்தா கடந்த 3 ஆண்டுகளாக நீதிமன்றத்தில் ஆஜராகவில்லை.
மேலும், 2019ஆம் ஆண்டில் இருந்து நீதிமன்றம் அனுப்பிய சம்மன்கள் எதற்கும் அவர் தரப்பில் இருந்து பதில் வரவில்லை. இதனால், முன்னதாக இந்த வழக்கில் அவருக்கு பிடிவாரண்ட் பிறப்பிக்கப்பட்ட நிலையில், அவர் இருக்கும் இடம் தெரியாததால் போலீசாரால் அவரை கைது செய்ய முடியவில்லை.
எனவே, தற்போது அவர் மீது பிணையில் வெளிவர முடியாத பிடிவாரண்ட்டை நீதிமன்றம் நேற்று பிறப்பித்துள்ளது. இந்த வாரண்ட் வரும் செப். 23ஆம் தேதிவரை செல்லுபடியாகும். நித்தியானந்தாவின் ஓட்டுநர் லெனின் என்பவர் 2010ஆம் ஆண்டு, நித்யானந்தா மீது பாலியல் பலாத்காரம் வழக்கு ஒன்றை தொடுத்தார்.
அதாவது, ராம்நகரில் இருந்த தனது ஆஷ்ரமத்தில் பணியாற்றிய பெண் சிஷ்யரை நித்தியானந்தா பாலியல் பலாத்காரம் செய்ததாக குற்றஞ்சாட்டப்பட்டது. இந்த வழக்கில் ஒருமுறை கைதான நித்தியானந்தா, பின்னர் பிணையில் விடுவிக்கப்பட்டார். இதைத் தொடர்ந்து, அவர் நாட்டை விட்டு வெளியேறிவிட்டதாகவும், அவருக்கு கொடுத்த பிணையை ரத்து செய்யக்கோரியும் 2020ஆம் ஆண்டில் ஓட்டுநர் லெனின் மீண்டும் வழக்கு தொடர்ந்தார். இதனால், நித்தியானந்தாவிற்கு அளிக்கப்பட்ட பிணை ரத்து செய்யப்பட்டது.
சர்ச்சைக்கு பேர் போன நித்தியானந்தா தற்போது நாட்டைவிட்டு வெளியேறி, கைலாசா என்ற ஒரு பகுதியில் ஆசிரமத்தை அமைத்து வாழ்ந்து வருவதாக தெரிவிக்கப்படுகிறது. ஆனால், இந்த இடம் குறித்த எந்த தெளிவான தகவல்களும் இதுவரை வெளிவரவில்லை என்பது குறிப்பிடத்தக்கது.
இதையும் படிங்க: அனுதாபம் தேடுகிறாரா நித்தியானந்தா? கைலாசாவில் நடப்பது என்ன?
