திருவனந்தபுரம்: பயங்கரவாத அமைப்புகளுடன் தொடர்பு, சதித் திட்டம் தீட்டியது, சட்டவிரோத பணப் பரிமாற்றம் உள்ளிட்ட செயல்களை மேற்கொண்டதாக கடந்த சில மாதங்களுக்கு முன் பாப்புலர் பிராண்ட் ஆஃப் இந்தியா(பி.எஃப்.ஐ) அமைப்பை சட்டவிரோத செயல்பாடுகள் தடைச் சட்டமான உபாவில் மத்திய அரசு தடை செய்தது.
மேலும் பி.எஃப்.ஐ. அமைப்பு நிர்வாகிகள் மற்றும் அவர்கள் தொடர்புடைய தமிழகம், கேரளா உள்ளிட்ட இடங்களில் தேசிய புலனாய்வு அமைப்பினர் தீவிர சோதனையில் ஈடுபட்டு முக்கிய ஆவணங்களைக் கைப்பற்றினர்.
இதுகுறித்து என்.ஐ.ஏ. விசாரணை நடத்தி வந்த நிலையில், பி.எஃப்.ஐ அமைப்பின் ஒரு பிரிவு, பயங்கரவாத செயல்களில் ஈடுபட பல்வேறு சமூகத்தைச் சேர்ந்த இளைஞர்களை திரட்டியதாகவும், அதற்கு போதிய ஆதாரங்கள் இருப்பதாகவும் கூறி பரபரப்பை ஏற்படுத்தியது. இதையடுத்து என்.ஐ.ஏ. நீதிமன்றம், வழக்குத் தொடர்பாக கைது செய்யப்பட்டவர்களின் காவலை மேலும் 90 நாட்களுக்கு நீடித்து விசாரணை நடத்த கூடுதல் கால அவகாசம் வழங்கியது.
இந்நிலையில், கேரளாவில் பாப்புலர் பிரண்ட் ஆஃப் இந்திய அமைப்பு தொடர்புடைய 56 இடங்களில் என்.ஐ.ஏ. அதிகாரிகள் திடீர் சோதனை நடத்தினர்.
கைது செய்யப்பட்ட பி.எஃப்.ஐ. அமைப்பைச் சேர்ந்த உறுப்பினர்களுக்கும், அல் கொய்தா பயங்கரவாத அமைப்புக்கும் தொடர்பு இருப்பதாகவும் மற்றும் தடைக்கு பின்னரும் பி.எஃப்.ஐ அமைப்பு இயங்கிக் கொண்டு சட்டவிரோத நடவடிக்கைகளுக்கு நிதி திரட்டுவதாகவும் கிடைத்த தகவலை அடுத்து என்.ஐ.ஏ அதிகாரிகள் சோதனை நடத்தியதாகத் தகவல் வெளியாகி உள்ளது.
கேரள மாநிலத்தின் பத்தினம்திட்டா, கொல்லம், ஆழப்புழா, திருவனந்தபுரம் உள்ளிட்ட 56 இடங்களில் பி.எஃப்.ஐ. அமைப்பின் இரண்டாம் நிலை ஊழியர்கள் மற்றும் அவர்கள் தொடர்புடைய இடங்களில் அதிகாலை முதல் சோதனையில் ஈடுபட்டு உள்ளனர்.
இதையும் படிங்க: பிரதமர் மோடியின் தாயார் உடல்நிலையில் முன்னேற்றம்!
