'மெட்ரோ மேன்' என்று பிரபலமாக அழைக்கப்படும் இ ஸ்ரீதரன், பாஜகவில் இணையத் தயாராக உள்ளதாக அக்கட்சியின் கேரள மாநிலத் தலைவர் இ சுரேந்திரன் தெரிவித்துள்ளார்.
இது குறித்து அவர் கூறுகையில், "இந்தாண்டு இறுதியில் சட்டப்பேரவைத் தேர்தலுக்கு முன்பு, கேரளாவில் நடைபெறவுள்ள விஜய யாத்ரா என்ற ரத யாத்திரையின்போது ஸ்ரீதரன் முறையாக கட்சியில் இணைவார். பிப்ரவரி 21ஆம் தேதியன்று, காசர்கோட்டில் தொடங்கும் ரத யாத்திரை, மார்ச் முதல் வாரத்தில் திருவனந்தபுரத்தில் நிறைவடையும்" என்றார்.
இந்த யாத்திரைப் பயணத்தை உத்தரப் பிரதேச முதலமைச்சர் யோகி ஆதித்யநாத் தொடங்கிவைக்கிறார். மேலும், பல அமைச்சர்கள் ரத யாத்திரைக்குத் தலைமை தாங்குவார்கள் எனக் கூறப்படுகிறது.
லக்னோ மெட்ரோ திட்டம், ஸ்ரீதரன் வழிகாட்டுதலின்பேரில்தான், சரியான நேரத்தில் முடிவடைந்தது. கொங்கன் ரயில்வே, டெல்லி மெட்ரோவை திறமையாக அமைத்து, நாட்டில் பொதுப் போக்குவரத்தின் முகத்தை மாற்றியமைத்த பெருமை இவரைத்தான் சாரும். 2011 டிசம்பர் 31 தேதியன்று, டெல்லி மெட்ரோவின் தலைவராக ஓய்வுபெற்றார்.
88 வயதாகும் இவர், கேரள சட்டப்பேரவைத் தேர்தலில் பாஜகவிற்காக களமிறங்கவுள்ளது பேசுபொருளாக மாறியுள்ளது. இவருக்கு 2001இல் பத்மஸ்ரீ விருதும், 2008இல் பத்ம விபூஷண் விருது வழங்கப்பட்டது குறிப்பிடத்தக்கது.
இதையும் படிங்க: மூதாட்டியின் வேதனை குற்றச்சாட்டு: ராகுலுக்குத் தவறாக மொழிபெயர்த்த நாராயணசாமி!
