கிரிதிஹ்: ஜார்கண்ட் மாநிலம் கிரிதிஹ் மாவட்டத்தில் உள்ள தாராபூர் கிராமத்தில், 12ஆவது மனைவியுடன் ஏற்பட்ட வாக்குவாதத்தில் ஆத்திரமடைந்த கணவர் அவரை கட்டையால் அடித்து கொலை செய்த சம்பவம் நடந்துள்ளது. தாராபூர் கிராமத்தை சேர்ந்த ராம்சந்திரா துரி என்வருக்கு 12 திருமணங்கள் நடந்துள்ளன. இவரது மோசமான குணத்தால் 11 மனைவிகள் அவரை விட்டு பிரிந்துள்ளனர்.
இவர் வரதட்சணைக்காக மட்டுமே அடுத்தடுத்து திருமணம் செய்துகொள்வதாக உள்ளூர் மக்கள் தெரிவிக்கின்றனர். இந்த நிலையில், கடந்தாண்டு சாவித்ரி தேவி (40) என்னும் பெண்ணை ராம்சந்திரா துரி 12ஆவதாக திருமணம் செய்து கொண்டார். இவருக்கும் இடையே அடிக்கடி தகராறு ஏற்பட்டு வந்துள்ளது. இவருக்கும் மதுப்பழக்கம் இருந்து வந்ததால், மதுபோதையில் அவர்கள் வாக்குவாதம் செய்துவந்ததாக கிராம மக்கள் தெரிவிக்கின்றனர்.
அந்த வகையில், நேற்றிரவு (ஏப்ரல் 2) இருவரும் ஒன்றாக மது அருந்தி உள்ளனர். நள்ளிரவில் இருவருக்கும் இடையே வாக்குவாதம் ஏற்பட்டுள்ளது. இதனால் ஆத்திரமடைந்த ராம்சந்திரா வீட்டில் இருந்த கட்டையால் சாவித்ரியில் தலையில் பலமாக தாக்கி உள்ளார். இந்த தாக்குதலில் பலத்த காயமடைந்த சாவித்ரி மயக்கமடைந்து கீழே விழுந்தார்.
அதன் பின் இன்று (ஏப்ரல் 3) அக்கம் பக்கத்தினர் சாவித்ரியை காண சென்ற போது அவர் உயிரிழந்து கிடந்தது தெரியவந்தது. இதையடுத்து போலீசாருக்கு தகவல் கொடுக்கப்பட்டது. இந்த தகவலின் அடிப்படையில் சம்பவயிடத்துக்கு விரைந்த போலீசார் சாவித்ரியின் உடலை மீட்டு உடற்கூராய்வுக்காக அனுப்பி வைத்தனர்.
அதோடு ராம்சந்திராவை கைது செய்தனர். முதல்கட்ட தகவலில் வரதட்சணை காரணமாக இருவருக்கும் இடையே வாக்குவாதம் ஏற்பட்டதும், அதனால் ஆத்திரத்தில் கொலை சம்பவம் நடந்துள்ளதும் தெரியவந்துள்ளது. பீகார், ஜார்கண்ட், சத்தீஸ்கர் மாநிலங்களில் வரதட்சணைக்காக ஒன்றுக்கும் மேற்பட்ட திருமணங்கள் செய்துகொள்வது வாடிக்கையாக உள்ளது. இதனால் பல கொலை சம்பவங்கள் நடக்கின்றன. இதனை கட்டுப்படுத்த மாநில அரசு நடவடிக்கை எடுக்க வேண்டும் என்று பொதுமக்கள் கோரிக்கை வைத்து வருகின்றனர்.
இதையும் படிங்க: திருமண பரிசாக வந்த எமன்.. ஹோம் தியேட்டர் வெடித்து புதுமாப்பிள்ளை பலி..
