டெல்லி: குடும்ப உறுப்பினர்களால் நடத்தப்படும் அரசியல் கட்சிகள் நாட்டின் ஜனநாயகத்துக்கு மிகப்பெரிய அச்சுறுத்தல் என்று கூறிய பிரதமர் நரேந்திர மோடி, ஒரு தேசிய கட்சி கூட அதற்கு இரையாகிவிட்டது என்று காங்கிரஸை மறைமுகமாக தாக்கினார். பிகார் மற்றும் பல்வேறு மாநிலங்களில் நடந்த இடைத்தேர்தலில் பாஜகவின் வெற்றியை கொண்டாடும் வகையில், கட்சித் தொண்டர்களுடன் பிரதமர் நரேந்திர மோடி உரையாற்றினார்.
அப்போது, “பாஜகவின் வெற்றிக்கான மந்திரம் அனைவரும் ஒன்றிணைந்து, அனைவருக்கும் முன்னேற்றம் மற்றும் நம்பிக்கை அளிப்பது (சப்கா சாத், சப்கா விகாஷ், சப்கா விஸ்வாஸ்) என்று கூறினார். மேலும் அவர் கூறுகையில், “மக்கள் நேர்மையான பணிகள், வளர்ச்சிக்கு ஆதரவாக வாக்களித்திருப்பதை தேர்தல் முடிவுகள் தெளிவாக தெரிவிக்கின்றன.
21ஆம் நூற்றாண்டில் தேசிய அரசியலில் வளர்ச்சிக்கான பாதையை மக்கள் விரும்புகின்றனர். நாட்டின் மீது பாஜக மீதும் பொதுமக்கள் வைத்துள்ள நம்பிக்கையை போற்றுகிறேன். தேர்தல் ஆணையம், பாதுகாப்பு படையினர் மற்றும் அரசு அலுவலர்களை பாராட்டுகிறேன். நீங்கள், தேர்தல் அமைதியாகவும், வெற்றிகரமாகவும் நடத்துவதை உறுதிசெய்துள்ளீர்கள்.
பாஜக மட்டுமே தேசிய அளவில் ஏழைகள், தலித்துகள் உள்ளிட்டோரை பிரதிநிதித்துவப்படுத்துகிறது. தாலுகா, மண்டலம் வாரியாகவும் பொதுமக்களின் தேவையை அறிந்துவைத்துள்ளது. கோவிட்-19 பெருந்தொற்று நெருக்கடியை பாஜக எதிர்கொண்ட விதத்தை இந்தத் தேர்தல் முடிவுகள் காட்டுகின்றன. பெண்கள் “சப்தமில்லாத வாக்காளர்கள்”, நாடு முழுக்க கிராமங்கள், நகரங்கள் என பெண்களின் ஆதரவு பாஜகவுக்கு உள்ளது” என்றார்.
மேலும், “பிகார் மக்கள் குண்டர்கள் ராஜ்ஜியத்தை நிராகரித்து, வளர்ச்சி ராஜ்ஜியத்தை தேர்ந்தெடுத்துள்ளனர். குடும்ப கட்சிகள் இந்திய ஜனநாயகத்தின் மிகப்பெரிய அச்சுறுத்தல், அதற்கு ஒரு தேசிய கட்சி இரையாகிவிட்டது” என்றார்.
இதையும் படிங்க: “பிகாரில் காங்கிரஸின் செயல்பாடு திருப்திகரமாக இல்லை”- பிஎல் புனியா
