ஊரடங்கு உத்தரவு பலரை வீட்டில் முடங்கவைத்துள்ளது. வொர்க் ஃப்ரம் ஹோமில் பல மணி நேர அலுவலகப் பணியை பெரும்பாலானோர் செய்துவருகின்றனர். ஒரே இடத்தில் அமர்ந்தபடி நீண்ட நேரம் வேலை செய்வதால், உடல் மீதான அக்கறையை மக்கள் சுத்தமாக மறந்துவிட்டனர். உடற்பயிற்சி நிலையங்களுக்கு சென்றால் கரோனா வந்துவிடுமோ என்ற பயத்தில் பலர் செல்வதை இன்னமும் தவிர்த்துவருகின்றனர்.
இதற்காகத்தான், ஆன்லைனில் வல்லுநர்கள் உடற்பயிற்சி தொடர்பான ஆலோசனைகளை வழங்கிவருகின்றனர். பலவிதமான செயலிகளும் செயல்பாட்டில் உள்ளன. அவற்றை பார்த்தபடியே வீட்டில் கிடைக்கும் ஃப்ரீ டைமில் உடற்பயிற்சி செய்யலாம். அதில், சில முக்கியமான உடற்பயிற்சிகளை இக்கட்டுரையில் காண்போம்.
சீல் வாக் பிளாங்க் ( Seal Walk Plank)
முழு உடலுக்குத் தேவையான உடற்பயிற்சியாகத்தான் பிளாங்க் பார்க்கப்படுகிறது. அதிலும், சிறிய மாற்றத்துடன் வருவதுதான் சீல் வாக் பிளாங்க். இது தோள் தசைகள், மலக்குடல் அடிவயிறு, ட்ரைசெப்ஸ் மற்றும் முதுகெலும்பு விறைப்பு ஆகியவற்றைச் சரிசெய்வதில் முக்கியப் பங்கு வகிக்கிறது.
செயல்முறை: முதலில் புஷ்-அப் நிலையில் இருந்தபடி தொடங்க வேண்டும். பின்னர், கைகள், முழங்கால்களின் ஆதரவில் உள்ள உங்கள் உடலின் மையப் பகுதியை உயர்த்த வேண்டும். அடுத்தது, மெதுவாக ஒரு கையை ஒரு அடி முன்னால் நகர்த்தி, அதே செயல்முறையை மற்றொரு கையால் மீண்டும் செய்யவும். சுமார் 30 விநாடிகள் இந்த பிளாங்க் உடற்பயிற்சியை செய்யலாம்.
டெட் பக் (Dead Bug)
இந்த உடற்பயிற்சி முக்கியமாக முதுகுவலி குறைத்திட பெரிதும் உதவுகிறது. முதுகு வலையாமல் நேராக இருப்பதற்கு இப்பயிற்சி உதவியாக இருக்கும் எனக் கூறப்படுகிறது.
செயல்முறை: உங்கள் முதுகு தரை அல்லது யோகா மேட்டில் இருக்கும்படி முதலில் படுத்துக் கொள்ளுங்கள். பின்னர், முழங்காலை 45° கோணத்தில் உயர்த்த வேண்டும். கால்கள் தரைக்குச் சமமாக இருந்திட வேண்டும். கைகள் தலைக்கு மேல் உயர்த்தப்பட்டிருக்க வேண்டும். இந்த போஷிசனில் குறைந்தபட்சம் 20 விநாடிகள் இருந்திட வேண்டும்.
குளுட் பிரிட்ஜ் அப்டக்ஷன் : தொப்பையை குறைப்பதில் இந்த உடற்பயிற்சி முக்கியப் பங்கு வகிக்கிறது. வயிற்றுப் பகுதியைச் சரிசமமாக மேம்படுத்த உதவியாக இருக்கும்.
செயல்முறை: முதலில் முகப்பகுதி வானத்தை நோக்கும் வகையில் படுக்க வேண்டும். கைகளை உடலை தொடாமல் நகர்த்திக்கொள்ள வேண்டும். பின்னர், முழுங்கால்களை வளைத்து தரையில் தொடும்படி வைத்திட வேண்டும். இறுதியாக, உங்கள் வயிற்றை பொறுமையாக மேலே உயர்த்தி நேராக கொண்டு வந்துவிட்டு, மீண்டும் பழைய நிலைக்கு திரும்ப வேண்டும். இதை ஒரு நாளைக்கு குறைந்தபட்சம் 10 முறை தாராளமாகச் செய்யலாம்.
இத்தகைய பல்வேறு உடற்பயிற்சிகள் வரிசையாக உள்ளன. பலவற்றை எளிதாக வீட்டில் முயற்சிக்கலாம். தற்போது, ஊரடங்கில் தளர்வுகள் அறிவிக்கப்பட்டு உடற்பயிற்சி நிலையங்களுக்கு மக்கள் படையெடுத்தாலும், வீட்டில் செய்வது சிலருக்கு மகிழ்ச்சியாக இருக்கும். மேலே குறிப்பிட்டுள்ளது போல் நன்கு தெரிந்த உடற்பயிற்சியை தொடரலாம்.
ஆன்லைனில் உடற்பயிற்சி வல்லுநரிடம் தெளிவான அறிவுரை கேட்டுக்கொண்ட பிறகு, நீங்கள் வீட்டில் உடற்பயிற்சி திட்டத்தை ஆரம்பிப்பது நல்லது ஆகும். ஒருவித ஊக்கத்தை மனத்தில் விதைக்க பெரும் உதவியாக இருக்கும்.
