மேற்கு வங்கத்தில் நடைபெற்ற தேர்தல் வன்முறை குறித்த வழக்கு கல்கத்தா உயர் நீதிமன்றத்தில் இன்று விசாரணைக்கு வந்தது. மேற்கு வங்க சட்டப்பேரவைத் தேர்தல் முடிவுக்குப் பின் திரிணாமுல் காங்கிரஸ் மற்றும் பாஜகவுக்கு இடையே வன்முறை வெடித்தது.
இதில், பாஜகவினர் பெரும் பாதிப்புக்குள்ளானதாக அக்கட்சியினர் வழக்குத் தொடர்ந்தனர். சம்பவம் தொடர்பாக உரிய நீதி விசாரணை நடைபெற வேண்டும் என பாஜகவினர் கோரிக்கை விடுத்து வருகின்றனர்.
இந்நிலையில், ஐந்து நீதிபதிகள் கொண்ட கல்கத்தா உயர் நீதிமன்றம், வழக்கு விசாரணையை சிபிஐ வசம் ஒப்படைத்துள்ளது. மேலும் ஓய்வு பெற்ற உச்ச நீதிமன்ற நீதிபதி இந்த வழக்கு விசாரணையை கண்காணிப்பார் எனவும் உயர் நீதிமன்ற உத்தரவில் தெரிவிக்கப்பட்டுள்ளது.
இந்த வழக்கு விசாரணையை விரைந்து நடத்தி, அடுத்த ஆறு வாரத்தில் அறிக்கை சமர்பிக்க வேண்டும் என சிபிஐக்கு உயர் நீதிமன்றம் உத்தரவிட்டுள்ளது.
உயர் நீதிமன்ற உத்தரவை பாஜக வரவேற்றுள்ளது. இதுகுறித்து பாஜக தேசிய பொது செயலாளர் கைலாஷ் விஜய்வர்கியா, "தேர்தல் வன்முறை என்பது ஆளும் திரிணாமுல் காங்கிரஸ் அரசால் பாஜக மீது ஏவப்பட்டது. உயர் நீதிமன்றத்தின் இந்த உத்தரவு ஜனநாயகம், அரசியல் சாசனம் ஆகியவற்றுக்கு கிடைத்த வெற்றி" என்றார்.
இதையும் படிங்க: தாலிபான்களை ஆதரிக்கும் எதிர்க்கட்சிகள் - யோகி ஆதித்யநாத் கண்டனம்
