வாகனத்திற்கான காப்பீடு உரிமம் வழங்குவதில் முறைகேடு: விபத்தில் உயிரிழந்தவர்களுக்கு இழப்பீடு பெறுவதில் சிக்கல்!

பேருந்திற்கு இருசக்கர வாகனத்திற்கான ப்ரீமியர் தொகையைச் செலுத்தி அதன் உரிமையாளர் முறைகேட்டில் ஈடுபட்டுள்ள சம்பவம் அதிர்ச்சியை ஏற்படுத்தியுள்ள நிலையில் அந்த பேருந்து விபத்தில் சிக்கி உயிரிழந்தவர்களுக்கான இழப்பீடுத் தொகையை பெறுவதில் சிக்கல் ஏற்பட்டுள்ளது.

ஜார்கண்ட்: ஜார்கண்ட் மாநிலம் கிரிதிஹ் பகுதியில் கடந்த 5ஆம் தேதி தனியார் பேருந்து ஒன்று விபத்துக்குள்ளானது. இந்த விபத்தில் 4 பேர் உயிரிழந்த நிலையில் விபத்துக்கான காரணம் குறித்து அதிகாரிகள் விசாரணை மேற்கொண்டு வருகின்றனர். இந்த விசாரணையில் அதிர்ச்சியூட்டும் பல திடுக்கிடும் தகவல்கள் வெளியாகியுள்ளது.

விபத்தில் பாதிக்கப்பட்டவர்களுக்குக் காப்பீட்டு உரிமம் பெறுவதற்கான முன்னெடுப்புகளை அதிகாரிகள் மேற்கொண்டுள்ளனர். ஆனால் அதற்கான எவ்வித முகாந்திரமும் இல்லாத வகையில் அந்த பேருந்தின் காப்பீட்டு உரிமத்தில் முறைகேடு ஏற்பட்டுள்ளது விசாரணையில் தெரியவந்துள்ளது.

இதனை அடுத்து இந்த விவகாரம் குறித்துக் கூடுதலாக விசாரணை மேற்கொண்ட அதிகாரிகளுக்கு அடுத்தடுத்து பல திடுக்கிடும் தகவல்கள் கிடைத்துள்ளது. அதாவது வணிக ரீதியாகப் பேருந்திற்குக் கட்ட வேண்டிய காப்பீட்டுத் தொகை கூடுதல் என்பதால், அதைப் புறக்கணிப்பதற்காக அந்த வாகனத்தின் உரிமையாளர் வேண்டுமென்றே இரு சக்கர வாகனத்திற்கான காப்பீட்டுப் பணத்தைச் செலுத்தி பேருந்திற்கான காப்பீட்டு உரிமத்தைப் பெற்று முறைகேட்டில் ஈடுபட்டுள்ளார்.

அதிலும் குறிப்பாக, JH 07H 2906 என்ற பதிவெண் கொண்ட பேருந்திற்கு, 1130003123010240021524 என்ற எண்ணில் காப்பீடு உரிமம் இருந்துள்ளது. இதை ஆய்வு செய்தபோது அந்த காப்பீடு உரிமம் அதே எண்ணுடன் தொடர்புடைய இருசக்கர வாகனத்தினுடையது எனத் தெரியவந்துள்ளது.

மேலும் விபத்தில் சிக்கிய பேருந்தின் உரிமையாளர் பெயர் ராஜு கான் என்பதும் பேருந்திற்கான காப்பீட்டு உரிமத்தில் இருந்த பெயர் பங்கஜ் குமார் என்பதும் விசாரணையில் தெரிய வந்துள்ளது. சம்பவம் குறித்து மாவட்ட ஆட்சியர் நமன் பிரியேஷ் லக்டாவிற்கு தகவல் அளிக்கப்பட்ட நிலையில் அவர் கூடுதல் விசாரணைக்கு உத்தரவிட்டுள்ளார்.

இது குறித்துப் பேசியுள்ள சமூக ஆர்வலரும், வழக்கறிஞருமான பிரபாகர் கூறுகையில், சட்டப்படி பொது போக்குவரத்து வாகனங்களுக்கு மூன்றாம் நபர் காப்பீடு கட்டாயம் எனவும், விபத்துக்குள்ளான பேருந்தின் ப்ரீமியர் தொகை சுமார் 60 ஆயிரம் ரூபாய் இருக்கலாம் என்றும் கூறியுள்ளார்.

கணிசமான இந்த ப்ரீமியர் தொகை செலுத்துவதை தவிர்க்கப் பலர் இதுபோன்ற சட்ட விரோத செயல்களில் ஈடுபடுவதாக அவர் குற்றம் சாட்டினார். மேலும் இந்த பேருந்தின் உரிமையாளர் காப்பீட்டு ப்ரீமியத்தை முறையாகச் செலுத்தி இருந்தால் விபத்தில் உயிரிழந்தவர்கள், காயமடைந்தவர்கள் என அனைவருக்கும் உரிய இழப்பீடு கிடைத்திருக்கும் எனவும் அவர் குறிப்பிட்டுள்ளார்.

மேலும் தனி நபர் ஒருவரின் ஆயுட் காலத்தைக் காப்பீட்டு நிறுவனங்கள் 60 வயதாகக் கணக்கிடும் நிலையில் இறந்தவர்களின் வயதைக் கணக்கிட்டு அதற்குத் தகுந்தார்போல் இழப்பீடு பெற்றிருக்கலாம் எனவும் அவர் தெரிவித்துள்ளார்.

இதையும் படிங்க: மணிப்பூர் கலவரம்.. ஓய்வு பெற்ற நீதிபதிகள் குழு விசாரணை... உச்ச நீதிமன்றம் உத்தரவு!