சத்தீஸ்கர் மாநிலத்தின் பிஜாபூர் சட்டப்பேரவைத் தொகுதியில் சமாஜ்வாதி கட்சியின் சார்பாக கடந்த முறை போட்டியிட்டு தோல்வி அடைந்தவர், சந்தோஷ் புனெம். பிஜாபூர் மாவட்டத்தின் சமாஜ்வாதி முக்கிய நிர்வாகியாக வலம்வந்த இவர், ரியல் எஸ்டேட் தொழிலிலும் ஈடுபட்டுவந்தார்.
இந்த நிலையில், நேற்று (செவ்வாய்கிழமை) மாலை சந்தோஷை கடத்திச் சென்ற நக்சல்கள், அவரைப் படுகொலை செய்துள்ளனர். இது குறித்து தகவல் அறிந்து அவரின் உடலை பெறுவதற்காக சென்ற அவரது உறவினர்களையும் நக்சல்கள் தடுத்து நிறுத்தியுள்ளனர்.
இது தொடர்பாக செய்தியாளர்களிடம் பேசிய மாவட்ட காவல் கண்காணிப்பாளர் திவ்யங் படேல், கட்டுமான பணிகளை பார்வையிடச் சென்ற சந்தோஷை நக்சல்கள் கடத்திச் சென்று கொலை செய்திருப்பதாகவும், உடலை மீட்க நடவடிக்கைகள் மேற்கொள்ளப்பட்டு வருவதாகவும் தெரிவித்துள்ளார்.
இதற்கிடையே, சந்தோஷ் கொலை செய்யப்பட்டுள்ள சம்பவம் அம்மாவட்டம் முழுவதும் தீயாக பரவியதையடுத்து, அங்கு பதற்றமான நிலை நீடித்துவருகிறது.
