கரோனா வைரஸ் பரவலைக் கட்டுப்படுத்த மத்திய அமைச்சர்களுக்கு இடையிலான ஆலோசனைக் கூட்டம் இன்று நடைபெற்றது. இதில் சுகாதாரத் துறை அமைச்சர் ஹர்ஷ் வர்தன், வெளியுறவுத் துறை அமைச்சர் ஜெய்சங்கர், விமானப் போக்குவரத்துத் துறை அமைச்சர் ஹர்தீப் சிங் பூரி, சுகாதாரத் துறை இணை அமைச்சர் அஸ்வினி குமார் சௌபே ஆகியோரோடு உயர்மட்ட அரசு அலுவலர்களும் இக்கூட்டத்தில் பங்கேற்றனர்.
அப்போது அமைச்சர் ஹர்ஷ் வர்தன் பேசுகையில், ''கரோனா பரவலைத் தடுக்க கட்டுப்படுத்தப்பட்ட பகுதிகள் தீவிரமாகக் கண்காணிக்கப்படுகின்றன. அங்கு பரிசோதனைகள் அதிகமாக்கப்படுகின்றன. மூத்த குடிமக்கள் தொடர்ந்து கண்காணிக்கப்படுகிறார்கள். கரோனா வைரஸ் எந்த இடத்தில் அதிகமாகப் பரவுகிறது என்பதை அறிந்து வேகமாகச் செயல்பட உத்தரவிடப்பட்டுள்ளது. ஆரோக்கிய சேது செயலி மூலம் ஹாட் ஸ்பாட்களை அறிந்து முன்னெச்சரிக்கை நடவடிக்கைகளும் மேற்கொள்ளப்படுகிறது.
சுகாதாரத் துறை அமைச்சகத்தின் முதன்மையான குறிக்கோள், இந்தியாவில் இறப்பு விகிதத்தைக் குறைப்பதுதான். இந்தியாவைப் பொறுத்தவரையில் 10 லட்சம் பேரில் 538 பேர் மட்டுமே கரோனாவால் பாதிக்கப்பட்டுள்ளனர்; அதேபோல் 15 பேர் மட்டுமே உயிரிழக்கின்றனர். கரோனா வைரசால் மோசமாகப் பாதிக்கப்பட்ட நாடுகளிலேயே இந்தியாவிலதான் இந்த எண்ணிக்கை குறைவாக உள்ளது.
அதில் 80 விழுக்காடு பாதிப்புகள் மகாராஷ்டிரா, தமிழ்நாடு, டெல்லி, கர்நாடகா, தெலங்கானா, குஜராத், மேற்கு வங்கம் உள்ளிட்ட எட்டு மாநிலங்களில்தான் உள்ளன. அதில் 49 மாவட்டங்களில்தான் பெரும்பாலான கரோனா பாதிப்புகள் கண்டறியப்பட்டுள்ளன.
கரோனா வைரசால் பாதிக்கப்பட்டவர்களைத் தனிமைப்படுத்த 3 லட்சத்து 77 ஆயிரத்து 737 படுக்கைகள் தயார் நிலையில் உள்ளன. ஐசியூ உதவியுடன் 39 ஆயிரத்து 820 படுக்கைகளும், ஆக்ஸிஜன் உதவியுடன் ஒரு லட்சத்து 42 ஆயிரத்து 415 படுக்கைகளும், 20 ஆயிரத்து 47 வென்டிலேட்டர்களும் தயார் நிலையில் உள்ளன'' என்றார்.
இதையும் படிங்க: காஷ்மீரில் பாஜக பிரமுகரை சுட்டுக்கொன்றவர்கள் யார்?
