குடியுரிமை திருத்தச் சட்டம், தேசிய குடிமக்கள் பதிவேடு ஆகியவற்றுக்கு எதிராக நாடு முழுவதும் போராட்டம் நடைபெற்றுவரும் சூழலில், தேசிய மக்கள் தொகை பதிவேட்டை (National Population Register) புதுப்பிக்க பிரதமர் நரேந்திர மோடி தலைமையிலான மத்திய அமைச்சகம் இன்று ஒப்புதல் வழங்கியுள்ளது.
இதையடுத்து, 2020 ஏப்ரல் 1ஆம் தேதி முதல் செப் 30ஆம் வரை நாடு முழுவதும் ஒவ்வொரு வீட்டிலும் கணக்கெடுப்பு நடத்தப்படவுள்ளது. இது தேசிய குடிமக்கள் பதிவேட்டுக்கு முன்னோட்டமாக இருக்குமோ என நாட்டு மக்கள் அச்சத்தில் உள்ளனர்.
இந்நிலையில், தேசிய மக்கள் தொகை பதிவேட்டுக்கும் (NPR), தேசிய குடிமக்கள் பதிவேட்டுக்கும் (NRC) எந்தச் சம்பந்தமும் இல்லை என மத்திய தகவல் மற்றும் ஒளிபரப்புத் துறை அமைச்சர் பிரகாஷ் ஜவடேகர் விளக்கமளித்துள்ளார்.
இது குறித்து செய்தியாளர்களிடம் பேசிய அவர், "தேசிய மக்கள் தொகை பதிவேட்டுக்கும் (NPR), தேசிய குடிமக்கள் பதிவேட்டுக்கும் (NRC) எந்தச் சம்பந்தமமும் இல்லை. உண்மையில் இது ஒரு சிறப்பான நடவடிக்கையாகும். மத்திய அமைச்சரவை கூட்டத்தில் தேசிய குடிமக்கள் பதிவேடு குறித்து ஆலோசிக்கப்படவில்லை.
பொதுமக்களுக்கு இடையூறு இல்லா வகையிலும், பொருட்செலவை குறைக்கும் நோக்கிலும் தேசிய மக்கள் தொகை கணக்கெடுப்பையும் (Census), தேசிய குடிமக்கள் பதிவேட்டையும் ஒரே நேரத்தில் செயல்படுத்தவுள்ளோம்.
இந்தக் கணக்கெடுப்பின்போது, யாரும் தங்களது அடையாள சான்றிதழ்களைக் காட்ட தேவையில்லை. கைரேகை உள்ளிட்ட பயோமெட்ரிக் பதிவுகள் எடுக்கப்படமாட்டாது. மொபைல் செயலி மூலமே இந்தக் கணக்கெடுப்பு நடத்தப்பட உள்ளது.
2021 மக்கள் தொகை கணக்கெடுப்புக்காக சுமார் எட்டாயிரத்து 754. 23 கோடி ரூபாயும் தேசிய மக்கள் தொகை பதிவேட்டுக்காக சுமார் மூன்றாயிரத்து 941.35 ரூபாயும் ஒதுக்கப்பட்டுள்ளது" என்றார்.
2021 மக்கள் தொகை கணக்கெடுப்பானது இரண்டு கட்டங்களாக நடைபெற உள்ளதாக அரசு வெளியிட்டிருந்த அறிவிப்பில் தெரிவிக்கப்பட்டுள்ளது.
என்.பி.ஆர்-இல் யார் யாரெல்லாம் இடம்பெறுவர்?
இந்தியாவில் உள்ள குறிப்பிட்ட பகுதியில் குறைந்தது ஆறு மாதம் அல்லது அதற்கும் மேற்பட்ட நாள்கள் தங்கியிருக்கும் அனைத்து மக்களும் (Usual Residents) தேசிய குடிமக்கள் பதிவேடு பட்டியலில் இடம்பெறுவர்.
இதையும் படிங்க : ஜமால் கசோகி கொலை வழக்கு: ஐந்து பேருக்கு மரண தண்டனை!
