கடந்த 1999ஆம் ஆண்டு இந்தியா-பாகிஸ்தான் இடையே கார்கில் போர் நடைபெற்றது. இதில் கடும் உயிர் சேதங்களுக்குப்பின், இந்தியா வெற்றிபெற்றது. இப்போரில் இந்தியா பெற்ற வெற்றியை நினைவுகூரும் வகையிலும் வீர மரணமடைந்த வீரர்களுக்கு மரியாதை செலுத்தும் வகையிலும் ஒவ்வொரு ஆண்டும் ஜூலை 26ஆம் தேதி கார்கில் வெற்றி தினம் கடைப்பிடிக்கப்பட்டுவருகிறது.
அந்த வகையில், ஜம்மு காஷ்மீரின் ஸ்ரீநகரில் உள்ள நினைவிடத்தில் உயிர் நீத்த வீரர்களுக்கு குடியரசுத் தலைவர் ராம்நாத் கோவிந்த் மரியாதை செலுத்தினார்.
மேலும் இது குறித்து பிரதமர் நரேந்திர மோடி தனது ட்விட்டர் பக்கத்தில், '1999இல் நடந்த கார்கில் போரின்போது, அங்கு சென்ற நமது துணிச்சலான வீரர்களுடைய ஒற்றுமையைக் காண எனக்கு வாய்ப்பு கிடைத்தது. அச்சமயத்தில் நான் ஜம்மு-காஷ்மீர், இமாச்சலப் பிரதேசத்தில் எனது கட்சிக்காக பணியாற்றிக் கொண்டிருந்தேன். கார்கிலுக்கான எனது பயணமும் வீரர்களுடனான கலந்துரையாடல்களும் என்வாழ்வின் மறக்க முடியாத தருணங்கள்' என பதிவிட்டுள்ளார்.
20ஆம் ஆண்டு கார்கில் வெற்றி தினத்தையொட்டி, மத்திய பாதுகாப்புத் துறை அமைச்சர் ராஜ்நாத் சிங், போரில் வீரமரணமடைந்த வீரர்களுக்கு டெல்லியிலுள்ள போர் நினைவிடத்தில் மலர் வளையம் வைத்து மரியாதை செலுத்தினார்.
மேலும், கார்கில் போர் நினைவு தினம் தொடர்பாக பாலிவுட் நட்சத்திரங்கள், விளையாட்டு வீரர்கள் என அனைவரும் ட்வீட் செய்துள்ளனர்.
