இந்தியா, தனது அணுசக்தி திறன் கொண்ட பிருத்வி-2 ஏவுகணை சோதனையை நேற்று இரவு (அக்.16) வெற்றிகரமாக நடத்தியது. 350 கி.மீ தொலைவுக்கு அப்பால் உள்ள இலக்கை துல்லியமாகத் தாக்கி அழிக்கவல்ல இந்த பிருத்வி-2 ஏவுகணை, ஒடிசா மாநிலம், பாலாசூரில் உள்ள வழக்கமான சோதனை தளத்தில் செலுத்தப்பட்டுள்ளது.
இந்த ஏவுகணை, ஒரு டன் அளவிலான குண்டுகளை சுமந்து செல்லும் வகையில் வடிவமைக்கப்பட்டுள்ளது. இச்சோதனை 40 நாட்களில் இந்தியாவின் பாதுகாப்பு ஆராய்ச்சி மற்றும் மேம்பாட்டு அமைப்பின் மூலம் நடத்தப்பட்ட 11ஆவது ஏவுகணை சோதனை ஆகும். கடைசியாக நடத்தப்பட்ட நிர்பயா ஏவுகணையின் சோதனையைத் தவிர மற்ற அனைத்து சோதனைகளும் வெற்றிகரமாக நடைபெற்றுள்ளன.
இது குறித்து பாதுகாப்பு ஆராய்ச்சி மற்றும் மேம்பாட்டு (டிஆர்டிஓ) அலுவலர் கூறுகையில், "ஒடிசாவில் செலுத்தப்பட்ட ஏவுகணையின் பாதை ரேடார்கள், எலக்ட்ரோ ஆப்டிகல் டிராக்கிங் சிஸ்டம்ஸ், டெலிமெட்ரி ஸ்டேஷன்கள் ஆகியவை தரைத்தளத்திலிருந்து டிஆர்டிஓவால் கண்காணிக்கப்பட்டது" என்றார்.
முன்னதாக கடந்த 2003ஆம் ஆண்டு பிருத்வி-1 ஏவுகணை வெற்றிகரமாக சோதனை செய்யப்பட்டது குறிப்பிடத்தக்கது.
இதையும் படிங்க....முதலமைச்சர் நிகழ்ச்சியிலிருந்து வெளியேற்றப்பட்ட செய்தியாளர்கள் தர்ணா போராட்டம்!
