நாடாளுமன்றத்தில் புதிதாக நிறைவேற்றப்பட்ட வேளாண் சட்டத்திற்கு எதிராக பல்வேறு மாநிலங்களில் போராட்டங்கள் நடைபெற்று வருகின்றன. விவசாயிகளை வஞ்சிக்கும் சட்டம் என்றும் கார்ப்பரேட் முதலாளிகளுக்கு ஆதரவாக உள்ளதாகவும் திமுக, காங்கிரஸ், கம்யூனிஸ்ட் உள்ளிட்ட எதிர்க்கட்சிகள் கடும் எதிர்ப்பு தெரிவித்து வருகின்றன.
இந்நிலையில், பிகார் மாநிலத்தில் காங்கிரஸ் ஆட்சிக்கு வந்தால் வேளாண் சட்டத்தை நீக்க சட்டப்பேரவையில் திருத்தம் கொண்டுவரப்படும் என காங்கிரஸ் பொதுச் செயலாளர் ரன்தீப் சுர்ஜேவாலா தெரிவித்துள்ளார். பாட்னாவில் பிகார் சட்டப்பேரவை தேர்தலுக்கான அறிக்கை வெளியிட்டு விழாவில் கலந்து கொண்ட அவர், "காங்கிரஸ் கூட்டணி ஆட்சிக்கு வந்தால், சட்டப்பேரவையின் முதல் கூட்டத்திலேயே புதிதாக நிறைவேற்றப்பட்ட வேளாண் சட்டங்கள் ரத்து செய்யப்படும்.
சந்தைகள் அனைத்தையும் அழித்துவிட்டால், விவசாயிகள் எங்கு குறைந்தபட்ச ஆதரவு விலையை பெறுவார்கள் என்பதை பிரதமர் மோடியும் பிகார் முதலமைச்சர் நிதிஷ் குமாரும் தெளிவுப்படுத்த வேண்டும். இந்து, இஸ்லாமியர்களுக்கிடையே பிரச்னையை தூண்டி அதனை தேர்தல் விவகாரமாக மாற்ற பாஜக நினைக்கிறது.
இது புதிய பாதைக்கான தேர்தல், எதிர்காலத்திற்கான தேர்தல். பிரிவினைவாதம், வெறுப்புணர்வு ஆகியவற்றை கொள்கையாக உள்ளவர்களுக்கும் சுயசார்பு, வளர்ச்சி ஆகியவற்றை கொள்கையாக வைத்துள்ளவர்களுக்கும் இடையே நடைபெறும் தேர்தல்" என்றார்.
பிகார் மாநில சட்டப்பேரவைத் தேர்தல் மூன்று கட்டங்களாக நடைபெறும் எனத் தேர்தல் ஆணையம் அறிவித்தது. அதன்படி மொத்தம் உள்ள 243 தொகுதிகளுக்கு அக்டோபர் 28, நவம்பர் 3, நவம்பர் 7 ஆகிய தேதிகளில் வாக்குப்பதிவு நடத்தப்பட்டு தேர்தல்களில் பதிவான வாக்குகள் நவம்பர் 10ஆம் தேதி எண்ணப்பட்டு முடிவுகள் அறிவிக்கப்படவுள்ளன.
இதையும் படிங்க: தொடரும் பாதுகாப்புப் படையினரின் என்கவுன்டர்: பிரிவினைவாதி சுட்டுக்கொலை
