நான்கு நாள் அரசுமுறை பயணமாக இந்தியா வந்துள்ள இலங்கை பிரதமர் ராஜபக்ச, இந்திய பிரதமர் நரேந்திர மோடியை டெல்லியிலுள்ள ஐதராபாத் இல்லத்தில் சந்தித்துப் பேசினார். இந்தப் பேச்சு வார்த்தையின்போது இருநாட்டின் பாதுகாப்பு, கூட்டு வணிகம் குறித்து விவாதிக்கப்பட்டது. இந்தச் சந்திப்பின்போது, இந்தியா மற்றும் இலங்கை நாட்டின் உயர் அலுவலர்கள் உடனிருந்தனர்.
இந்த பேச்சுவார்த்தையில், பிரதமர் மோடி, இலங்கை தமிழர்களின் எதிர்பார்ப்புகளை அந்நாட்டு அரசு புரிந்துகொள்ள வேண்டும் என்றும், ஒருங்கிணைந்த இலங்கையில் அவர்களுக்கு சம வாய்ப்புகளையும், நீதியினையும், அமைதியையும் அந்நாட்டு அரசு வழங்கும் என நம்புகிறேன் என தெரிவித்ததாகவும் தகவல் வெளியாகியுள்ளது.
அதேபோல், இலங்கையின் பிரதமர் ராஜபக்ச, இந்தியா தங்களது நட்பு நாடு. தங்களுக்கும் இந்தியாவிற்கும் இடையே நெருங்கிய வரலாற்று தொடர்புகள் உள்ளன என்றும் இலங்கையில் தீவிரவாதத்தை ஒழிப்பதற்கு இந்தியா உதவி புரிந்து வந்திருக்கிறது என்று தெரிவித்ததாகவும் கூறப்படுகிறது.
மேலும், தமிழ்நாடு மீனவர்கள் பிரச்னை குறித்து விவாதிக்கப்பட்டபோது, மீனவர்கள் பிரச்னையை நாங்கள் மனிதாபிமானத்தோடு கையாள்வோம் என்று ராஜபக்ச உறுதியளித்ததாகக்வும் தகவல் தெரிவிக்கிறது.
இதையும் படிங்க: டெல்லி தேர்தல்: வாக்காளர்களுக்கு ஈடிவி பாரத் வாயிலாக கேஜ்ரிவால் வேண்டுகோள்!
