latest national news புனேவில் நடந்த 'ஜான் ஜாக்ரான்' என்ற விழிப்புணர்வு நிகழ்ச்சியில் பங்கேற்ற பாஜக செயல்தலைவர் ஜேபி நட்டா, 370 சட்டப்பிரிவை ரத்து செய்தது காஷ்மீர் பள்ளத்தாக்கு பகுதியில் அமைதியையும் வளர்ச்சியையும் ஏற்படுத்தும் என்று கூறியுள்ளார்.
இது குறித்து அவர் பேசுகையில், "சட்டப்பிரிவு 370 ஒரேநாளில் ரத்து செய்யப்பட்டாலும், அதற்கான திட்டங்கள் நீண்ட நாட்களாகத் தீட்டப்பட்டுவந்தன. இது நரேந்திர மோடியின் தீர்க்கமான மனோபலத்தினாலும் அமித் ஷாவின் அரசியல் சாணக்கியத்தனத்தினாலும் நிறைவேறியது. சட்டப்பிரிவை நீக்குவதற்கு முன்னரே பள்ளத்தாக்குப் பகுதியில் நாங்கள் சில முன்னேற்பாடுகள் செய்யவேண்டியிருந்தது" என்றார்.
காஷ்மீருக்கு வழங்கிய சிறப்புத் தகுதி ரத்து செய்யப்பட்டது குறித்த பாடம் பள்ளியில் இடம்பெறுமா என்று செய்தியாளர்கள் கேட்டதற்கு, இளைஞர்கள் இது குறித்து எல்லாம் தெரிந்துகொள்ள வேண்டும் என அறிவுறுத்தினார்.
அக்டோபர் 21ஆம் தேதி நடைபெறவுள்ள மகாராஷ்டிரா சட்டப்பேரவைத் தேர்தலுக்கான பரப்புரையை பாஜக தொடங்கியுள்ள நிலையில், தேர்தல் குறித்து கேட்கப்பட்ட கேள்வி ஒன்றுக்குப் பதிலளித்த அவர்,
"எதிர்க்கட்சியைப் பொறுத்தவரை அதில் பாதிப்பேர் சிறையிலும் மீதிப்பேர் பிணையிலும்தான் உள்ளனர். அதுபோக மற்றவர்கள் சிபிஐ, அமலாக்கத் துறை விசாரணைக்கு ஆஜராகிவருகின்றனர்" என்று காங்கிரஸ் கட்சியை கடுமையாக விமர்சித்துப் பேசினார்.
முன்னதாக காஷ்மீரின் சிறப்புத் தகுதி ரத்து செய்யப்பட்டது மகாராஷ்டிரா சட்டப்பேரவைத் தேர்தல் பரப்புரையில் பயன்படுத்தப்படும் என்று உள் துறை அமைச்சர் அமித் ஷா பேசியிருந்தது நினைவுகூரத்தக்கது.
இதையும் படிக்கலாமே: கீழமை நீதிமன்றத்தை அணுக சிறப்பு அமர்வு உத்தரவு; சின்மயானந்தா வழக்கில் திடீர் திருப்பம்!
