இஸ்ரோவின் கனவுத் திட்டமாக அறியப்படும் சந்திரயான் 2 ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் ஏவுதளத்திலிருந்து ஜூலை மாதம் 22ஆம் தேதி வெற்றிகரமாக விண்ணில் செலுத்தப்பட்டது. தற்போது பூமியின் சுற்று வட்டப்பாதையில் சந்திரயான் 2 சுற்றிவருகிறது. சந்திரயான் 2 விண்கலத்தின் சுற்றுவட்டபாதை நான்காம் முறையாக வெள்ளிக்கிழமை அதிகரிக்கப்பட்டது.
இந்நிலையில் சந்திரயான் 2 விண்கலம் பூமியை எடுத்த புகைப்படங்களை இஸ்ரோ தனது ட்விட்டர் பக்கத்தில் பகிர்ந்துள்ளது. நேற்று மாலை சுமார் 5.30 மணியளவில் வட, தென் அமெரிக்கப் பகுதிகளின் மேல் சந்திரயான் 2 சுற்றிவரும்போது இந்தப் புகைப்படங்கள் எடுக்கப்பட்டுள்ளன.
விரைவில் நிலவை நோக்கி தனது சுற்றுவட்டப் பாதையில் சுற்றத் தொடங்கவுள்ள சந்திரயான் 2, செப்டம்பர் 7ஆம் தேதி நிலவில் தரையிறங்கும் என்று எதிர்பார்க்கப்படுகிறது.
