உத்தரப் பிரதேசத்தில் மொராதாபாத்தில் கரோனாவால் பாதிக்கப்பட்டவரை அழைத்துச்சென்ற மருத்துவக் குழுவினரின் ஆம்புலன்ஸ் வாகனத்தை வழிமறித்த ஒரு கும்பல் கற்களை வீசி அவர்கள் மீது தாக்குதல் நடத்தியது.
இதில் ஒரு மருத்துவரும், மூன்று மருத்துவ உதவியாளர்களும் காயமடைந்தனர். மருத்துவர்கள் வந்த ஆம்புலன்ஸ் வாகனத்தையும் அந்தக் கும்பல் சேதப்படுத்தியது.
இந்நிலையில் மருத்துவர்கள் மீது நடத்தப்பட்ட தாக்குதலுக்கு மருத்துவர்கள் கண்டனம் தெரிவித்துள்ளனர். கரோனா வைரஸ் தொற்றால் பாதிக்கப்பட்டவர்களுக்கு சிகிச்சை அளித்துவரும் மருத்துவர்கள் இது குறித்து கூறுகையில், ”ஏற்கனவே நாங்கள் கூடுதல் பணிச்சுமையால் மன உளைச்சலில் உள்ளோம். இதுபோன்ற நேரத்தில் மருத்துவர்கள் மீது தாக்குதல் நடத்துவது வேதனையளிக்கிறது.
இதுபோன்ற சம்பவங்கள் மீண்டும் நடைபெறாமல் அரசு நடவடிக்கை எடுக்க வேண்டும். மருத்துவர்களுக்கே பாதுகாப்பாக இல்லாத சூழ்நிலையில், நாங்கள் எப்படி மற்றவர்களுக்கு சிகிச்சை அளிக்க முடியும்.
எங்கள் குடும்ப உறுப்பினர்களைப் பிரிந்து நாங்கள் எங்கள் கடமையைச் செய்துவருகிறோம். ஆனால் இதுபோன்று நடைபெறும் சம்பவங்களால், மற்ற நோயாளிகளை நாங்கள் எப்படிப் பார்த்துக்கொள்ள முடியும். தாக்குதல் நடத்துபவர்களின் மீது அரசு தகுந்த நடவடிக்கை எடுக்க வேண்டும்” எனத் தெரிவித்தனர்.
இதையும் படிங்க: பணி முடிந்து வீடு திரும்பிய மருத்துவர்கள் மீது காவலர்கள் தாக்குதல்!
