டெல்லி தேர்தலைப் பொறுத்தவரை அதில் பல்வேறு சவால்கள் உள்ளன. தேர்தலுக்குப் பிந்தைய கருத்துக்கணிப்புகள் உண்மையாக இருக்கும் பட்சத்தில் அரவிந்த் கெஜ்ரிவால் தலைமையிலான ஆம் ஆத்மி கட்சி அபார வெற்றியைப் பெறும். இதுவே, தொங்கு சட்டப்பேரவையோ அல்லது சுமாரான வெற்றியோ பெறுமேயானால், நாடு முழுவதும் பெரும் போராட்டத்திற்கு வழிவகுத்த குடியுரிமை திருத்தச் சட்டத்தையும் தேசிய குடிமக்கள் பதிவேட்டையும் அமல்படுத்தும் வேலைகளை மத்திய அரசு துரிதப்படுத்தத் தொடங்கிவிடும்.
டெல்லி தேர்தலில் பாஜக ஆக்ரோஷமாக நுழைவதற்கு முன், ஆம் ஆத்மி கட்சியின் வெற்றி மிகத் தெளிவாக இருந்தது. கருத்தியல் ரீதியாக தன்னை நடுநிலைவாதியாகக் காட்டிக்கொள்ளும் அரவிந்த் கெஜ்ரிவால், தலைநகரைச் சிறந்த நகராக மாற்றுவேன் என்று வாக்குறுதி கொடுத்தார்.
கெஜ்ரிவால் ஆட்சியிலிருந்து ஐந்து ஆண்டுகளில் அவர் தனது வாக்குறுதிகளில் அனைத்தையும் நிறைவேற்றவில்லை என்றாலும் ஊழலை ஒழிப்பது, இலவச மின்சாரம், இலவச குடிநீர் என முக்கிய வாக்குறுதிகளை நிறைவேற்றியுள்ளார். மேலும், டெல்லி முழுவதும் மொஹல்லா கிளினிக்குகள் உருவாக்கியது மட்டுமின்றி தனியார் மருத்துவமனைகளையும் இலவச மருத்துவச் சேவை வழங்கவும் அவர் நிர்பந்தித்தார். கெஜ்ரிவாலின் இந்தத் திட்டத்தால் இதய அறுவை சிகிச்சைகளும்கூட நம் தலைநகரில் இலவசமாக மேற்கொள்ளப்பட்டது.
டெல்லி தேர்தல் வாக்குப்பதிவுக்கு 15 நாள்கள் முன்புவரை, பாஜக தேர்தல் பரப்புரையைப் பெரியளவில் மேற்கொள்ளவில்லை. ஆனால் அதன்பின் பாஜக செய்த தேர்தல் பரப்புரையில் முழுவதும் நச்சுத்தன்மை நிறைந்திருந்தது. தேர்தலுக்காக எந்தவொரு கட்சியும் இந்தளவுக்கு மோசமான நச்சுத்தன்மை பரப்பும் பரப்புரையை மேற்கொண்டதில்லை. குடியுரிமை திருத்தச் சட்டத்திற்கும் தேசிய குடிமக்கள் பதிவேட்டிற்கும் எதிராக ஷாகீன் பாக் பகுதியில் நடைபெற்றுவரும் பெண்களின் போராட்டம் குறித்து பேசும்போது அமித் ஷா, "இத்தேர்தலில் வாக்குப்பதிவின்போது பாஜக ஆதரவாளர்கள் ஷாகீன் பாக்கிற்குக் கேட்கும் வகையில் தங்கள் வாக்குகளைப் பதிவு செய்யவேண்டும்" என்றார்.
அப்பகுதியில் வசிக்கும் மக்களுக்குப் போராட்டக்காரர்கள் பெரும் சிரமத்தை ஏற்படுத்துவதாகவும் அவர்கள் பரப்புரையில் கூறினார்கள். முழக்கங்களை எழுப்புபவர்கள் எல்லாம் துரோகிகள் என்று கூறிய மத்திய அமைச்சர் அனுராக் தாக்கூர் அவர்களை சுட வேண்டும் என்றும் தனது பரப்புரையில் கூறியிருந்தார். மற்றொரு பாஜக எம்.பி. பிரவேஷ் வர்மா, போராட்டக்காரர்கள் இந்துக்களின் வீடுகளில் நுழைந்து, பாலியல் வன்புணர்வு செய்வார்கள் என்று கூறினார்.
ஆனால், இந்தப் போராட்டத்தில் ஈடுபட்டுள்ளவர்கள் எல்லாம் பெண்கள் என்பது அவருக்குத் தெரியாமல் போய்விட்டது போலும். தலைவர்களின் இந்த வன்முறை தூண்டும் பேச்சுக்களால் உந்தப்பட்ட இரு பாஜக ஆதரவாளர்கள், ஷாகீன் பாக் பகுதியிலும் ஜாமியா பல்கலைக்கழகம் அருகிலும் துப்பாக்கிச் சூட்டில் ஈடுபட்டனர். நல்வாய்ப்பாக இந்தத் துப்பாக்கிச் சூட்டில் யாரும் உயிரிழக்கவில்லை.
வாக்காளர்களை வகுப்புவாரியாகப் (மத ரீதியாக) பிரிக்க வேண்டும் என்பதை இந்த வெறுப்பு உமிழும் பேச்சின் முக்கிய நோக்கம். இந்தச் செயல்முறை பாஜகவுக்கு நிறைய முறை வேலை செய்துள்ளது. இதானால் ஏன் மற்றொரு முறை இதே யுக்தியை பயன்படுத்தக்கூடாது என்று அக்கட்சித் தலைமை நினைத்திருக்கலாம்.
இதுமட்டுமின்றி, சிஏஏ - என்ஆர்சி போராட்டங்களால் பல சாலைகள் மூடப்பட்டிருந்தது, போராட்டங்களில் பங்கேற்காதவர்களுக்கு கோபத்தை ஏற்படுத்தியிருந்தது. இதுவே மத்திய அரசின் செயல்பாடுகளால் பாதிக்கப்பட்டு, அவர்களின் கவனத்தை ஈர்க்கக் கடும் குளிரில் அமர்ந்து போராடிவரும் பெண்களை அச்சுறுத்துமாறு தனது ஆதரவாளர்களுக்குக் கட்டளையிட பாஜகவுக்குப் போதுமானதாக இருந்தது.
இதுதவிர, தலைநகருக்கு நிறைய நலத்திட்டங்களை செய்துள்ளதாகக் கூறிய ஆம் ஆத்மியின் கூற்றையும் பாஜக முற்றாக நிராகரித்தது. மேலும், ஆம் ஆத்மியை அராஜகவாதி என்று விமர்சித்த பாஜக, ஆம் ஆத்மி கட்சியை நம்பி ஆட்சியைத் தர முடியாது என்றும் கூறியது.
2019ஆம் ஆண்டு நடைபெற்ற நாடாளுமன்ற தேர்தலில், டெல்லியிலுள்ள பெரும்பாலான தொகுதிகளில் இரண்டாவது இடத்தைப் பெற்ற காங்கிரஸ் கட்சியும் ஆம் ஆத்மியின் கூற்றை நிராகரித்து. அதற்குப் பதில், மறைந்த முன்னாள் டெல்லி முதலமைச்சர் ஷீலா தீட்சித் தலைமையிலான காங்கிரஸ் ஆட்சி சாதித்ததை மக்களிடையே கூறினர். இது ஆம் ஆத்மியின் செயல்பாடுகளை இருட்டடிப்புச் செய்தது.
இருப்பினும், காங்கிரஸ், பாஜகவுக்கு சவால் கொடுக்கும் நிலையில் இருப்பதாகத் தெரியவில்லை. இதுமட்டுமின்றி, காங்கிரஸ் தேசியவாதத்திற்க்கும் உள்ளூர்வாதத்திற்குமிடையே சிக்கிக்கொண்டது. பெரும்பாலான கருத்துக்கணிப்புகள் ஆம் ஆத்மி பெருவாரியான இடங்களில் வெற்றிபெறும் என்றும் பாஜக ஒரு சில இடங்களைக் கைப்பற்றும் என்றே கூறுகிறது. காங்கிரஸ் அனைத்துக் கருத்துக்கணிப்புகளிலும் இறுதி இடத்தையே பெறுகிறது.
வாக்குப்பதிவுக்கு பிந்தைய கருத்துக்கணிப்புகளைப் புறம்தள்ளும் பாஜகவினர், 70 சட்டப்பேரவை உறுப்பினர்களைக்கொண்ட டெல்லியில் 48 இடங்களைக் கைப்பற்றி ஆட்சி அமைப்போம் என்கிறார்கள். பிப்ரவரி 8ஆம் தேதி நடைபெற்ற தேர்தலில் பதிவான இறுதி வாக்குப்பதிவு நிலவரத்தை வெளியிட தேர்தல் ஆணையம் காலம் தாழ்த்தியது. இது பாஜகவின் கூற்றைத் தீவிரமாக எடுத்துக்கொள்ள காரணமாக அமைந்தது. வாக்குப்பதிவு தினத்தன்று இறுதியில் 57 விழுக்காடுகள் வாக்குகள் பதிவானதாகக் கூறப்பட்டிருந்தது.
ஆம் ஆத்மி உள்ளிட்ட மற்ற கட்சிகள் வாக்குப்பதிவு நிலவரத்தை வெளியிட காலம் தாழ்த்துவது குறித்து விமர்சிக்கத் தொடங்கியதும், ஒரு நாள் தாமதமாக, டெல்லி தேர்தலில் 62 விழுக்காடு வாக்குகள் பதிவானதாகத் தேர்தல் ஆணையம் அறிவித்தது. இது 2015ஆம் ஆண்டு பதிவான வாக்குகளைவிட ஐந்து விழுக்காடு குறைவு.
தேர்தல் தினத்தன்று மாலை 5 மணிக்கு 50 விழுக்காடாக இருந்த வாக்குப்பதிவு நிலவரத்தை மாலை 6 மணிக்கு 62 விழுக்காடாக தேர்தல் ஆணையம் மாற்றியுள்ளதாக எதிர்க்கட்சிகள் சந்தேகம் எழுப்பின. வாக்குப்பதிவின் கடைசி இரண்டு மணி நேரத்தில் மின்னனு வாக்குப்பதிவு இயந்திரத்தில் முறைகேடு நடந்திருக்கலாம் என்றும் அவர்கள் அச்சம் தெரிவித்தனர்.
பாஜக எதிர்பார்த்ததைவிட சிறப்பாகச் செயல்பட்டால், அதற்கு மின்னனு இயந்திரம்தான் காரணம் என்று ஆம் ஆத்மியும் காங்கிரஸ் கட்சியும் குற்றம் சாட்டும். இதனால் தலைநகரில் பெரும் போராட்டமே வெடிக்கலாம். இதுவே பாஜக ஒரு சில இடங்களில் மட்டும் வெற்றிபெற்றால், மின்னனு வாக்குப்பதிவு இயந்திரங்கள் குறித்த குற்றச்சாட்டுகள் மறைந்துவிடும்.
டெல்லியை இழந்தாலும் பாஜக அமைதியாக இருக்காது என்று கருத்தும் இங்கு நிலவுகிறது. அதன்பின் சிஏஏ-என்ஆர்சி போராட்டங்களை அவர்கள் கடுமையாக எதிர்ப்பார்கள். டெல்லியில் மத்திய அரசின் கீழ் இருக்கும் காவல் துறை, ஏற்கனவே ஆர்ப்பாட்டக்காரர்களைக் கைதுசெய்து அடைக்க அரங்கங்களைப் பயன்படுத்த அனுமதி கோரியுள்ளது. அதாவது தேர்தலுக்குப் பிறகு, எதிர்க்கட்சிகளுடனும் சிஏஏ எதிர்ப்பாளர்களுடனும் பாஜகவின் மோதல் மேலும் மோசமடையும். வேறு வார்த்தைகளில் கூறுவேண்டும் என்றால் இந்தத் தேர்தல்களுக்குப் பின்னால் பல விஷயங்கள் பொதிந்துள்ளன.
இதையும் படிங்க: தலைநகரம் யாருக்கு? டெல்லி தேர்தல் குறித்து அலசும் ஈடிவி பாரத்
